विराटनगर । नेपाल प्रिमियर लिग (एनपिएल) को आफ्नो अन्तिम खेलमा पनि विराटनगर किंग्सले पराजय बेहोरेको छ ।
त्रिवि मैदान कीर्तिपुरमा आइतबार भएको खेलमा विराटनगर काठमाडौं गुर्खाजसँग एक विकेटले पराजित बनेको हो ।
जितका लागि एक सय १८ रनको सामान्य लक्ष्य पछ्याएको काठमाडौँले १८.१ ओभरमा नौ विकेटको क्षतिमा एक सय २० रन जोड्दै लक्ष्य पूरा गरेको हो ।
काठमाडौँका लागि प्रतिक श्रेष्ठले सर्वाधिक ३९ रन बनाए भने यस्तै शंकर रानाले अविजित १६, रसिद खानले १४, जेराल्ड इरसमसले १२ र माइकल लेभिटले १० विकेट लिए ।
बलिङमा विराटनगरका कप्तान सन्दीप लामिछानेले तीन विकेट लिए भने चार्स सोल, अनिल खरेल र वसिर अहमदले दुई दुई विकेट लिए ।
यसअघि टस हारेर ब्याटिङको निम्तो पाएको विराटनगरले १९.५ ओभरमा सबै विकेटको क्षतिमा एक सय १७ रन बनाएको थियो ।
विराटनगरका लागि राजेश पुलामीमगरले २५ रन बनाए भने ओपनर दीपक बोहराले २०, स्कट एडवार्डले १५ र वसिर, अहमदले १३ र निकोलनस किर्तनले १२ रन बनाए ।
विराटनगरलाई सस्तैमा रोक्न काठमाडौँका जेरार्ड इरास्मसले चार ओभरमा १७ रन खर्चिएर सर्वाधिक चार विकेट लिए ।
यस्तै दीपेश कँडेलले दुई तथा साहब आलम, करण केसी र डानियल डाउथवेटले एक एक विकेट लिए ।
यससँगै काठमाडौं प्लेअफ संघारमा उभिएको छ ।
पराजित विराटनगर यसअघिनै प्लेअफ होडबाट बाहिरिसकेको छ । लिगमा सबै सात खेल सकेको काठमाडौँले आठ अंक बनाएको छ ।
अब काठमाडौँलाई प्लेअफमा पुग्न सोमबार हुने कर्णाली याक्स र सुदूरपश्चिम रोयल्सबिचको नतिजाले भर पार्नेछ ।
उक्त खेलमा कर्णाली हारेमा काठमाडौँको अगाडिको यात्रा सहज बन्नेछ । अहिले ६ खेल सकेको कर्णालीको पनि आठ अंक छ ।
