विराटनगर । सुनसरीको दुहबी नगरपालिकामा तेस्रो संंस्करणको कोशी प्रदेशस्तरीय मेयरकप ब्याडमिन्टन प्रतियोगिता हुने भएको छ ।
आगामी शनिबार र आइतबार दुई दिन दुहबी ब्याडमिन्टन क्लबको आयोजनामा कोशी प्रदेशस्तरीय मेयरकप ब्याडमिन्टन प्रतियोगिता हुने भएको हो ।
बिहीबार पत्रकार सम्मेलनको आयोजना गर्दै क्लबका अध्यक्ष दिलबहादुर थापा (केदार) र कार्यक्रम संयोजक सुभाष भट्टराईले उक्त जानकारी गराएका हुन् ।
मेन्स डबल ओपेन, मेन्स डबल ४५+ ओपेन भेट्रान, इन्टर मेम्बर र मिक्स डवल गरी चार तहका इभेन्टहरू हुने आयोजकले जनाएको छ ।
प्रतियोगिताको प्रथम हुनेलाई रु ३१ हजार नगद र ट्रफी प्रदान गरिने छ भने दोस्रो हुनेलाई रु १६ हजार र ट्रफी प्रदान गरिने आयोजकको भनाइ छ ।
यसैगरी, तेस्रो हुने दुई टिमलाई १६ हजार र ट्रफी पुरस्कार रहेको आयोजक क्लबका अध्यक्ष थापाले जनाएका छन् ।
मेन्स डवल भेट्रान विजेता प्रथम, द्वितीय र तृतीयलाई क्रमशः रु २१ हजार, ११ हजार र १० हजार नगद पुरस्कार रहेको छ ।
मिक्स डबल विजेता समूहलाई क्रमशः २१ हजार, ११ हजार र १० हजार नगद राशि रहेको छ भने इन्टर मेम्बर विजयी प्रथम द्वितीय, तृतीय समूहलाई क्रमशः १५ हजार, ८ हजार र ८ हजार नगद पुरस्कार राशि रहेको छ ।
दुहबी रंगशालानजिक रहेको कवर्डहलमा हुने प्रतियोगिताको उद्घाटन भने दुहबी नगरप्रमुख वेदनारायण गच्छादारले गर्ने आयोजकले पत्रकार सम्मेलनमार्फत जानकारी गराए ।
खेलाडी दर्ता शुल्क, सहयोगी दाता, सदस्यहरू र मुख्य प्रायोजकबाट जम्मा अनुमानित नौ लाख संकलन हुने र सो रकम प्रतियोगिता सञ्चालनमा खर्च हुने अध्यक्ष थापाले जानकारी गराएका छन् ।
