विराटनगर । विराटनगर किंग्सले नेपाल प्रिमियर लिग (एनपिएल) मा फेरि एकपटक पराजय बेहोरेको छ ।
कीर्तिपुरस्थित त्रिवि मैदानमा बिहीबार भएको खेलमा विराटनगर पोखरा एभेन्जर्ससँग सुपर ओभरमा पराजित भएको हो ।
रेमन रेइफर नायक बन्दा पोखरा एभेन्जर्ससँग सुपर ओभरमा विराटनगर १३ रनले पराजित गरेको हो ।
पोखराको यो दोस्रो जित हो । पोखराले लुम्बिनी लायन्सलाई १० विकेटले हराएको थियो । तर, चितवन राइनोजसँग ८७, जनकपुर बोल्ड्स र कर्णाली याक्ससँग समान सात विकेटको हार बेहोर्यो ।
यता, विराटनगरले पनि लुम्बिनीलाई नै दुई विकेटले पराजित गरेको हो । उसले जनकपुरसँग आठ विकेट, सुदूरपश्चिम रोयल्ससँग ९० र कर्णालीसँग सात रनको हार बेहोरेको थियो ।
विराटनगरले दिएको १४० रनको लक्ष्य पछ्याइरहेको पोखरालाई अन्तिम ओभरमा जितका लागि १४ रन चाहिएको थियो । बसिर अहमदले पहिलो बलमा नारायण जोशीलाई कुनै रन दिएनन् ।
दोस्रो बलमा जोशीले एक रन लिएका थिए । तेस्रो बलमा रेमन रेइफरले छक्का प्रहार गरेसँगै खेल रोमाञ्चक मोडमा पुगेको थियो ।
तीन बलमा सात रन चाहिएको अवस्थामा बसिरले दुई बल डट राखे । तर, अन्तिम बलमा रेइफरले छक्का प्रहार गर्दै खेल सुपर ओभरमा पुर्याए। सुपर ओभरमा पनि रेइफर नै नायक बने ।
उनले कप्तान सन्दीपको पाँच बलमा १७ रन जोडे । आन्द्रे गौसले एक रन बनाएसँगै विराटनगरले सुपर ओभरमा १९ रनको लक्ष्य पाएको थियो ।
बलिङमा पनि उनै रेइफर आए । मार्टिन गप्टिल र निकोलस किर्टनलाई मात्रै पाँच रन दिँदै पोखरालाई दोस्रो जित दिलाए ।
त्यसअघि पोखराका आन्द्रेस गौसले सर्वाधिक ३९ रन बनाए । २७ बल खेलेका उनले सात चौका प्रहार गरे ।
कप्तान कुशल भुर्तेलले ३१, दिनेश खरेलले ११ रन बनाउँदा रेइफर ३४ र नारायण जोशी दुई रनमा अविजित रहे ।
विराटनगरका प्रतिश जिसीले सर्वाधिक चार विकेट लिए । चार ओभर गरेका उनले १८ रन खर्चिए। क्रिस सोलले दुई विकेट आफ्नो नाममा लेखाए ।
त्यसअघि कीर्तिपुरस्थित त्रिवि क्रिकेट मैदानमा टस जितेर पहिला ब्याटिङ थालेको विराटनगरले निर्धारित २० ओभरमा सात विकेट गुमाउँदै १३९ रन बनाएको थियो ।
विराटनगरका स्कट एडवार्ड्सले डेब्यु खेलमै सर्वाधिक ४५ रन बनाए । ३५ बल खेलेका उनले पाँच चौका प्रहार गरे । ओपनर लोकेश बम २६ रनमा आउट हुँदा निकोलस क्रिर्टनले १९ रन बनाए ।
बसिर अहमद २१ र प्रतिश जिसी चार रनमा अविजित रहँदा अन्यले दोहोरो अंकमा रन बटुल्न सकेनन् । पोखराका सागर ढकाल र रेमन रेफरले समान दुई विकेट लिए । कुशल भुर्तेल र दीपेश खरेलको नाममा समान एक विकेट रह्यो ।
