विराटनगर । लुम्बिनी लायन्सले काठमाडौंमा जारी नेपाल प्रिमियर लिग (एनपिएल) मा पहिलो जित आत्मसात् गरेको छ ।
त्रिवि मैदान कीर्तिपुरमा मंगलबार भएको खेलमा कप्तान रोहित पौडेलले ब्याट र बलमा उत्कृष्ट प्रदर्शन गरेपछि लुम्बिनीले चितवन राइनोजलाई ३३ रनले हराएको हो ।
रोहितले ब्याटिङमा ८० रन बनाए भने बलिङमा ४ विकेट लिएका थिए । पहिलो जितपछि लुम्बिनीले पाँचौ खेलमा अंक खाता खोलेको छ ।
टस हारेर पहिले ब्याटिङको निम्तो पाएको लुम्बिनीले निर्धारित २० ओभरमा ६ विकेटको क्षतिमा एक सय ६७ रन बनाएको थियो ।
लुम्बिनीका लागि कप्तान रोहित पौडेलले ८० रन बनाए । उनले ५७ बलमा ६ चौका र पाँच छक्का प्रहार गरे ।
साद विन जाफरले अविजित ५२ रन बनाए । उनले ३५ बलमा चार चौका र एक छक्काको सहयोगमा उक्त रन बनाएका हुन् ।
यस्तै ओपनर अर्जुन साउदले १५ र टोम मुर्सले १० रन बनाए ।
बलिङमा चितवनका रिजन ढकालले तीन तथा कुशल मल्ल र रन्जित कुमारले एक एक विकेट लिए ।
