विराटनगर । घरेलु टिम विराटनगरले पाहुना टोली राजविराजलाई हराउँदै प्रथम नेपाल हब महिला टी-२० क्रिकेट प्रतियोगिताको उपाधि जितेको छ ।
सोमबार भएको अन्तिम खेलमा राजविराजसँग पराजित भए पनि समग्रमा २-१ ले जित निकाल्दै विराटनगर च्याम्पियन बनेको हो ।
सोमबार विराटनगरको मेर्लिबोन ज्वाला क्रिकेट मैदानमा भएको अन्तिम खेलमा राजविराजले घरेलु टोली विराटनगरलाई ८ विकेटले पराजित गरेको थियो ।
अन्तिम खेल जिते पनि तीन खेलको सिरिजमा विराटनगरसँग २–१ ले पराजित भएसँगै राजविराज रित्तो हात घर फर्किएको हो ।
नेपाल क्रिकेट फाउन्डेसनको आयोजना तथा क्रिकेट विथ बाउन्ड्री को सहयोगमा भएको प्रतियोगिताको अन्तिम खेलमा पाहुना टोली राजविराज विजयी भएको थियो ।
टस जितेर ब्याटिङ गरेको विराटनगरले निर्धारित २० ओभरमा ७ विकेट गुमाई ९९ रनमा सीमित भयो ।
विराटनगरका लागि रानु राजवंशीले २२ रन बनाउँदा काजल राजवंशीले १० रनको योगदान दिइन् । राजविराजकी सुस्मिता यादवले २ विकेट लिँदा अपेक्षा यादव, दीपा राम र साक्षी यादवले १–१ विकेट लिइन् ।
एक सय रनको विजयी लक्ष्य पछ्याएको राजविराजले १७ दशमलव १ बलमा २ विकेट गुमाई सो विजयी लक्ष्य पार गरेको थियो ।
राजविराजकी प्लेयर अफ म्याच साक्षी यादवले ५४ बलमा १ छक्का र ६ चौका प्रहार गर्दै अविजित ५६ रन बनाउँदा बन्दना यादवले अविजित ८ रनको योगदान दिइन् ।
विराटनगरकी सानु राजवंशीले १ विकेट लिइन् ।
प्रतियोगिताको उत्कृष्ट ब्याटर राजविराजकी साक्षी यादव घोषित हुँदा उत्कृष्ट बलर राजविराजकी अपेक्षा यादव भइन् ।
विजयी तथा अन्य खेलाडीलाई कोशी प्रदेश क्रिकेट संघका अध्यक्ष सर्वजितराज पाण्डे र मोरङ जिल्ला क्रिकेट संघका अध्यक्ष महमद सादबावु कुरैसीले पुरस्कार तथा प्रमाण पत्र वितरण गरे ।
