विराटनगर । विराटनगरमा जारी नरेश श्रेष्ठ मेमोरियल वाइवाई पुरुष यु-१९ राष्ट्रिय क्रिकेट प्रतियोगिताको उपाधिका लागि सुदूरपश्चिम र लुम्बिनी प्रदेश भिड्ने भएका छन् ।
अंक तालिकाको शीर्ष स्थानमा रहँदै सुदूर र दोस्रो स्थानमा रहेको लुम्बिनीले बुधबार (भोलि) फाइनल खेलमा प्रतिस्पर्धा गर्ने भएका हुन् ।
लिगको सबै खेल सम्पन्न हुँदा सुदूरपश्चिमले ६ खेलमा ५ मा जित र १ खेलमा हार खेप्दै १० अंकका साथ शीर्ष स्थान कब्जा गर्यो ।
लुम्बिनीले पनि ६ खेलमा ५ मा जित र १ खेलमा पराजय बेहोर्दै १० अंक जोड्यो । तर, साथ नेट रन रेटका आधारमा पछि पर्दै लुम्बिनी दोस्रो स्थानमा रह्यो ।
गण्डकी प्रदेश ६ खेलमा तीन खेलमा जित र तीन खेलमा पराजित हुँदै ६ अंकका साथ तेस्रोमा रहँदा मधेशले ६ खेलमध्ये ३ मा जित र ३ खेलमा पराजय बेहोर्यो । ६ अंक भए पनि नेट रन रेटमा पछि पर्दै मधेश चौथो स्थानमा रह्यो ।
वागमती ६ खेलमध्ये दुई खेलमा जित र ४ खेलमा पराजित हुँदै चार अंकका साथ पाँचौं स्थानमा रहँदा कर्णाली ६ खेलमा दुई जित र ४ खेलमा पराजित हुँदै ४ अंकका साथ छैँटौं स्थानमा रह्यो ।
घरेलु टोली कोशी भने ६ खेलमध्ये एकमा जित र ५ खेलमा पराजित हुँदै दुई अंकका साथ पुछारमा रह्यो ।
प्रतियोगिताअन्तर्गत आज भएको खेलमा मधेश र कर्णाली प्रदेशले जित हात पारे ।
विराटनगरको मेर्लिबोन ज्वाला क्रिकेट मैदानमा भएको खेलमा कर्णालीले वागमती प्रदेशलाई २० रनले पराजित गरेको हो ।
टस जितेर ब्याटिङ गरेको कर्णाली निर्धारित ५० ओभरको २० दशमलव ५ बलमा सबै विकेट गुमाई ७५ रनमा सीमित भयो ।
कर्णालीका विजय बोहोराले १६ रन बनाउँदा कमल विष्टले १५ रनको योगदान दिए ।
वागमतीका दिनेश विष्टले ५ विकेट लिए । उनले ३ दशमलव ५ बलमा २ मेडन राख्दै ६ रन मात्र दिए । त्यस्तै दयानन्द मण्डलले ३ विकेट र दिपक सेरलाले २ विकेट लिए ।
७६ रनको विजयी लक्ष्य पाएको वागमतीले १८ दशमलव ३ बलमा सवै विकेट गुमाउँदै ५५ रनमा सीमित हुन पुग्यो ।
वागमतीका रोशन विश्वकर्माले १३ रन बनाउँदा उत्तम मगरले १० रनको योगदान दिए ।
कर्णालीका प्लेयर अफ द म्याचविपिन शर्माले ४ विकेट लिँदा युनिस ठकुरी र अनुज चनराले समान ३–३ विकेट लिए ।
आजै वैजनाथपुरको गिरिजाप्रसाद कोइराला खेल मैदानमा भएको रोमाञ्चक खेलमा मधेशले लुम्बिनीलाई १ विकेटले पराजित गरेको छ ।
यस खेलभन्दा अगाडि प्रतियोगितामा लुम्बिनी एकमात्र अपराजित टोली रहेको थियो ।
टस जितेर ब्याटिङ गरेको लुम्बिनीले निर्धारित ५० ओभरको खेलमा २० ओभरमा सबै विकेट गुमाई ७० रनको योगफल बनायो ।
लुम्बिनीका समीर अलीले सर्वाधिक १२ रनबाहेक अरू ब्याटरले दोहोरो अंकलाई छुन सकेनन् । मधेशका प्लेयर अफ द म्याच अविशेख तिवारीले सर्वाधिक ५ विकेट लिए । उनले ६ ओभरमा १६ रन दिए ।
७१ रनको लक्ष्य पाएको मधेशले २७ ओभरमा ९ विकेट गुमाउँदै लक्ष्य भेट्टायो । मधेशका मयन यादवले २२ रन बनाउँदा इमरमन शेखले ११ रनको योगदान दिए । लुम्बिका रमेह कुर्मीले ४ विकेट लिँदा सन्तोष यादवले ३ विकेट लिए ।
