विराटनगर । विराटनगरमा जारी नरेश श्रेष्ठ मेमोरियल वाइवाई पुरुष यु–१९ राष्ट्रिय क्रिकेट प्रतियोगितामा कोशी र सुदूरपश्चिम प्रदेश विजयी भएका छन् ।
प्रतियोगिताअन्तर्गत बिहीबार बैजानाथपुरको गिरिजाप्रसाद कोइराला खेल मैदानमा भएको खेलमा सुदूरपश्चिमले मधेश प्रदेशलाई ११ रनले पराजित गरेको छ ।
टस हारेर ब्याटिङ गरेको सुदूरपश्चिमले निर्धारित ५० ओभरको खेलमा ४२ ओभरमा सबै विकेट गुमाई १ सय १९ रनको झिनो योगफल बनायो ।
सुदूरपश्चिमका नरेन भट्टले नटआउट ४४ रन बनाउँदा युवराज खत्रीले २५ रनको योगदान दिए । मधेशका अफ्रुदिन रैनले ४ विकेट लिँदा रन्जित कुमारले ३ विकेट लिए ।
१ सय २० रनको झिनो लक्ष्य पाएको मधेशले ४३ दशमलव ४ बलमा सवै विकेट गुमाई १ सय ८ रनमा सीमित हुन पुग्यो ।
मधेशका मयन यादवले सर्वाधिक ४७ रनको योगदान दिए ।
सुदूरपश्चिमका प्लेयर अफ द म्याच नरेन साउदले ४ विकेट दिए । उनले १० ओभरमा ७ मेडन ओभर गर्दै ४ रन दिए ।
सुदूरपश्चिमले खेलेको ४ खेलमा ३ मा जित हात पार्दै ६ अंककासाथ दोस्रो स्थानमा यथावत रहेको छ भने मधेशले खेलेको ४ खेलमा २ मा जित र २ मा पराजित चौथो स्थानमा झरेको छ ।
त्यसैगरी, मेर्लिबोन ज्वाला क्रिकेट मैदानमा आजै भएको अर्काे खेलमा कोशीले कर्णाली प्रदेशलाई १ सय १८ रनको विशाल अन्तरले पराजित गरेको छ ।
प्रतियोगितामा कोशीको पहिलो जित हो । टस जितेर ब्याटिङ गरेको कोशीले निर्धारित ५० ओभरको खेलमा ४८ दशमलव ३ बलमा सवै विकेट गुमाई २ सय ३ रन बनायो ।
कोशीका प्लेयर अफ द म्याच सोनु अन्सारीले ८९ रन बनाउँदा इस्टन रिजालले २३ रन र आशिष मगरले २१ रन बनाए । कर्णालीका अरविन्द घर्तीले सर्वाधिक ४ विकेट लिए ।
२ सय ४ रनको विजयी लक्ष्य पाएको कर्णालीले २५ दशमलव १ बलमा सबै विकेट गुमाउँदै ८५ रन सीमित भयो । कर्णालीका अरविन्द घर्तीले २१ रन बनाउँदा कमल विष्टले १७ रनको योगदान दिए ।
कोशीका प्रेम कामतले ३ विकेट लिँदा आशिष मगरले पनि ३ विकेट दिए ।
कोशीले खेलेको ४ खेलमा १ खेलमा जित र ३ खेलमा पराजित हुँदै २ अंकका साथ छैठौ स्थान रहेको छ भने कर्णालीले खेलेको ३ खेलमा जित विहिन हुँदै पुछारमा रहेको छ ।
शनिबारको खेल बैजानाथपुरको गिरिजाप्रसाद कोइराला खेल मैदानमा कोशी र वागमती प्रदेश तथा मेर्लिबोन ज्वाला क्रिकेट मैदानमा लुम्विनी र गण्डकी प्रदेशबीच खेल हुनेछ ।
