विराटनगर । नेपाली महिला फुटबलकी स्ट्राइकर सावित्रा भण्डारी ‘साम्बा’ले हालै सम्पन्न सातौं संस्करणको साफको फाइनलमा हारेको हार बिर्सिन धेरै समय लाग्ने दुखेसो पोखेकी छन् ।
बुधबार त्रिपुरेश्वरस्थित दशरथ रंगशालामा भएको फाइनलमा घरेलु टिम नेपाल बंगलादेशसँग २-१ गोलले पराजित भएसँगै उपाधिबाट बञ्चित भएको थियो ।
उक्त हार हार बिर्सिन लामो समय लाग्ने टिप्पणी साम्बाको छ । सामाजिक सञ्जालमा एक पोष्ट गर्दै साम्बाले साफको फाइनलमा फेरि एक पटक उपविजेतामा सिमित हुँदा दु:ख लागेको टिप्पणी गरेकी हुन् ।
उनले आम दर्शकले देखाएको साथ र सहयोगप्रति सधै ऋणी रहेको उल्लेख गर्दै अर्को पटक उपाधि दिलाउने विश्वास व्यक्त गरेकी छन् ।
‘साफ महिला च्याम्पियनसिपमा पुन: एक पटक उपविजेतामा सिमित हुँदा निकै दु:ख लागेको छ । यो हार बिर्सन धेरै समय लाग्नेछ । यो हामी दोस्रो भएको भन्दा पनि योग्य रहेको ट्रफि जित्न नसकेको भन्ने बुझेको छु । यहाँहरुको साथ र सहयोगका लागि सदा ऋणी रहनेछु’ उनले भनेकी छन् ‘आशा छ, यो विश्वासलाई अर्कोपटक उपाधिका साथ न्याय दिन सक्नेछु । यहाँहरुले नेपालमा हुने महिला फुटबल गतिविधिलाई अझ सहयोग गरेर थप बलियो बनाउन सहयोग गर्नुहुनेछ भन्ने विश्वास छ ।
साम्बा व्यावसायिक फुटबल खेल्न बिहीबार बिहान नै पेरिसतर्फ लागेकी छन् । उनी फ्रान्सको ए डिभिजन महिला लिग क्लब एन अभान्ट गुइनगाम्पबाट खेल्छिन् ।
