काठमाडाैं । आइसिसी पुरुष क्रिकेट विश्वकप लिग–२ शृंखलाको पहिलो खेलमा नेपाल अमेरिकासँग पराजय बेहोको छ ।
अमेरिकाको डालसस्थित ग्रान्ड प्रेरी स्टेडियममा आइतबार राति भएको खेलमा नेपाल घरेलु टोलीसँग ३ विकेटले पराजित भएको हो ।
नेपालले दिएको २८७ रनको लक्ष्य अमेरिकाले ७ विकेटको क्षतिमा दुई बल अगावै २९१ रन बनाउँदै पूरा गर्यो ।
अमेरिकाको जितमा ओपनर शयान जहाँगिरले ९७ बलमा १२ चौका र ४ छक्कासहित १०४ रनको शतकीय पारी खेले ।
कप्तान मोनांक पटेलले ७६ बलमा ५ चौका प्रहार गर्दै ६२ रन बनाए ।
नेपालका लागि कुशल भुर्तेलले ६ ओभरमा २३ रन खर्चेर ४ विकेट लिए । सोमपाल कामीले २ र ललित राजवंशीले १ विकेट हात पारे ।
त्यसअघि, टस हारेर ब्याटिङको निम्तो पाएको नेपालले निर्धारित ५० ओभरमा १० विकेट गुमाएर २८६ रन बनाएको थियो ।
नेपालका लागि कप्तान रोहित पौडलले शानदार प्रदर्शन गरे । उनले ७५ बलमा ९६ रन बनाए । सोही क्रममा उनले तीन छक्का र ८ चौका प्रहार गरे ।
नेपालका लागि अनिल साहले ६२ बलमा ५६ रन बनाए । उनले ५ चौका प्रहार गरे ।
यस्तै आशिफ शेखले ५३ बलमा एक छक्का र ७ चौकासहित ५२ रन बनाए ।
कुशल भुर्तेलले ११, आरिफ सेखले ३७, दीपेन्द्रसिंह ऐरीले १३, गुल्सन झाले १, सोमपाल कामीले २, ललित राजवंशीले १, सन्दीप लामिछानेले ५ र करण केसीले ३ रन बनाएर आउट भए ।
नेपालले अब दोस्रो खेल मंगलबार स्कटल्यान्डसँग खेल्नेछ । लिग–२ मा नेपालसहित क्यानडा, अमेरिका, नेदरल्याण्डस्, स्कटल्यान्ड, नामिबिया, ओमान र यूएई सम्मिलित छन् ।
