काठमाडौं । घरेलु टिम नेपाल काठमाडौंमा जारी सातौं संस्करणको साफ महिला च्याम्पियनसिपको फाइनलमा प्रवेश गरेको छ ।
आइतबार भएको दोस्रो सेमिफाइनलमा पाँच पटकको विजेता भारतलाई पेनाल्टी सुटआउटमा हराउँदै नेपाल उपाधिनजिक पुगेको हो ।
त्रिपुरेश्वरस्थित दशरथ रंगशालामा भएको तनावपूर्ण खेल निर्धारित समय १-१ गोलको बराबरीमा रोकिएको थियो ।
त्यसपछि भएको पेनाल्टीमा ४-२ गोलले हराउँदै नेपाल लगातार फाइनलमा पुगेको हो ।
पहिलो खेलमा भुटानसँग गोलरहित बराबरीमा रोकिएको नेपाल बाँकीका दुई खेलमा तुलनात्मक रूपमा कमजोर मानिएका माल्दिभ्सलाई ११–० र श्रीलंकालाई ६–० ले हराएर समूह ‘बी’ विजेता बनेर नेपाल सेमिफाइनल पुगेको छ ।
अब, नेपालले उपाधिका लागि बुधबार बंगलादेशसँग भिड्ने छ । बंगलादेश आजै भएको पहिलो सेमिफाइनल खेलमा भुटानलाई हराउँदै फाइनलमा पुगेको थियो ।
भारतले साफका पछिल्ला ६ मध्ये पाँच संस्करणको उपाधि जितेको थियो । नेपालले साफका पाँच फाइनलमा बेहोरेको हारमध्ये चारमा भारत नै बाधक बनेको थियो ।
साफ महिला च्याम्पियनसिपमा नेपाल भारतपछिको दोस्रो सफल टिम हो । नेपालले चार पटक फाइनल खेल खेलेको भए पनि उपाधि भने जित्न सकेको छैन ।
बंगलादेशमा भएको पहिलो संस्करणमा भारतले नेपाललाई १–० गोलले हराउँदै उपाधि जितेको थियो भने श्रीलंकामा भएको दोस्रो संस्करणमा भारतले नेपाललाई ३–१ गोलले हराएको थियो ।
पाकिस्तानमा भएको तेस्रो संस्करणको उपाधि भिडन्तमा नेपालले भारतसँग ६–० गोलको लज्जास्पद हार बेहोरेको थियो ।
चौथो संस्करण भारतमा भएको थियो, जहाँ नेपाल सेमिफाइनलसम्म पनि पुग्न पाएन । त्यसबेला घरेलु टोलीले बंगलादेशलाई ३–१ गोलले हराउँदै उपाधि घरमै राख्यो ।
पाँचौं संस्करणयता महिला साफ नेपालमै हुँदै आइरहेको छ । सन् २०१९ मा भएको पाँचौं संस्करणमा आयोजक नेपाललाई ३–१ गोलले हराउँदै भारतले उपाधि छिन्यो ।
अघिल्लो संस्करणमा भने घरेलु टिम नेपाल बंगलादेशसँग ३–१ गोलले नै हार्यो । अब, यसपालि भने नेपालले उपाधि घरमै राख्ने योजना बनाएको छ ।
