विराटनगर । सुनसरीको दुहबी नगरपालिकाले आफ्ना पालिकाभित्र रहेका शारीरिक अपांगता भएका व्यक्तिहरूलाई सहज जीवनयापनका लागि सहायक सामग्री वितरण गरेको छ ।
दुहबी नगरपालिकाको स्वास्थ्य शाखा, प्रदेश सरकार र करुणा फाउन्डेसनको सहकार्यमा आयोजित कार्यक्रममा दुहबी नगरप्रमुख वेद गच्छादारले उक्त सामग्रीहरू वितरण गरेका हुन् ।
विभिन्न किसिमका शारीरिक अपांगता भएका व्यक्तिहरूलाई सहज हिँड्डुल गर्न र व्यावसायिक जीवनयापन गर्न सकून भन्ने उद्देश्यले नगरप्रमुख गच्छादारले उक्त सामग्री वितरण गरेका हुन् ।
६ थान ह्विल चेयर, तीन थान ट्वाइलेट चेयर, तीन थान ह्वाइट केन र दुई थान वैशाकी र एक थान स्कुटर गरी १५ जनालाई रु तीन लाख ५० हजार बराबरको १५ थान सहायक सामग्री वितरण गरेका थिए ।
एक खुट्टा गुमाएका शारीरिक अपांगता भएका दुहबी-८ का विनोद बुढाथोकीलाई एक थान स्कुटरसमेत नगर प्रमुखले वितरण गरे ।
कार्यक्रमलाई सम्बोधन गर्दै नगर प्रमुख गच्छादारले शारीरिक अपांगता भएका व्यक्तिहरूलाई समाजमा हेरिने हेयको दृष्टिकोणलाई हटाउन र सपांगजस्तै समान व्यवहार, माया र आदर सम्मान गर्नुपर्छ भन्ने सन्देश समुदायस्तरमा पुर्याउन नगरपालिकाले यस्ता कार्यक्रमहरू गरेको बताए ।
शारीरिक अपांगता पूर्वजन्मको फल नभएर दुर्घटना र गर्भावस्थामा कुपोषण भएका कारण हुन सक्ने भन्दै उनले भने, ‘यस्ताखाले अपांगता न्यूनीकरणगर्न नगरपालिकाले विवाह भएकै दिनदेखि स्वास्थ्य स्वयम्-सेविका र स्वास्थ्य शाखाले निगरानी गर्ने, गर्भावस्थामा चेकजाँच र पोषणको व्यवस्था गर्ने र जन्मेका दिनदेखि सुनौला हजार दिनमार्फत खोप तथा अन्य जाँचहरु गर्दै आएको जनाए ।
विभिन्न कारणले अपांगता हुन पुगेका नगरभित्रका नागरिकलाई आत्मनिर्भरताका लागि समूह बनाएर आवश्यक सिपमुलक तालिम र बिउ पुँजीका रूपमा समूहगत ५० हजारसम्म उपलब्ध गराई स्वरोजगारको बाटो सिर्जना गर्दै आएको उनले बताए ।
नगरपालिकाले अपांगताको क्षेत्रमा धेरै काम गरिसकेको र स्वास्थ्य बीमासमेत रु ५ सयमात्र तीर्दा १ लाखसम्मको उपचार खर्च गर्न सक्ने वातावरण आफूले बनाइदिएको उनको भनाइ छ ।
कार्यक्रममा प्रमुख प्रशासकीय अधिकृत हिमालय बराल, सिबिआर सहजर्ता, स्वास्थ्य शाखाका अधिकारीहरू र करुणा फाउन्डेसनका प्रतिनिधिहरूको उपस्थित रहेको थियो ।
