विराटनगर । रोबर्ट लेवान्डोस्कीको दुई गोलको मद्दतले बार्सिलोनाले सेभियालाई सजिलै हराएको छ ।
आइतबार राति भएको ला लिगा अन्तरगतको खेलमा बार्सा ५-१ गोलले विजयी बनेको हो ।
३६ वर्षीय खेलाडी यो सिजन उत्कृष्ट फर्ममा रहेका छन् । उनले सबै प्रतियोगिताका १२ खेलमा १४ गोल गरेका छन् ।
पछिल्लो ६ खेलमा मात्र उनले १० गोल गरेका हुन् ।
खेलको २४ औं मिनेटमा पेनाल्टीमार्फत लेवान्डोस्कीले टोलीलाई अग्रता दिलाएका थिए ।
२८ औं मिनेटमा पेड्रीले टोलीको अग्रता दोब्बर बनाए । ३९ औं मिनेटमा लेवान्डोक्सीले टोलीलाई ३-० को अग्रता दिलाए ।
लेवान्डोस्की युरोपका शीर्ष पाँच लिगमा तेस्रो सर्वाधिक गोलकर्ता बनेका छन् ।
उनले जिमी ग्रिभेसको ३६६ रनको कीर्तिमान बराबरी गरेका हुन् ।
उनीभन्दा अघि क्रिस्टियानो रोनाल्डो (४९५) र लियोनेल मेस्सी (४९६) मात्र रहेका छन् ।
खेलको अन्त्यतिर पाब्लो टोरेले दुई गोल थपे भने सेभियाका लागि स्टानिस इडुम्बोले सान्त्वना गोल गरे ।
१० खेलपछि २७ अंकसहित बार्सिलोना लिगको शीर्ष स्थानमा रहेको छ । सेभिया १२ अंक बटुल्दै १३औं स्थानमा सीमित छ ।
