विराटनगर । अमेरिकी क्लब इन्टर मियामीका अर्जेन्टिनी फरवार्ड लियोनल मेसीलाई विशेष अवार्ड प्रदान गरिएको छ ।
स्पेनिस मिडिया मार्काको अमेरिकी शाखाले ३७ वर्षीय मेसीलाई बिहीबार राति मार्का अमेरिका अवार्डबाट सम्मान गरेको हो ।
अमेरिकाको मियामी शहरमा विशेष समारोहको आयोजना गरेर मार्काले उक्त अवार्ड प्रदान गरेको हो ।
खेल करिअरको सर्वाधिक धेरै ४६औं उपाधि जितेका मेसीलाई सुनको प्रतीमाबाट सम्मान गरेको मार्काले उनी फुटबल इतिहासको सर्वकालीन महान् खेलाडी भएको घोषणासमेत गरेको थियो ।
उक्त सम्मान ग्रहण गर्दै मेसीले आफू अझै उपाधिको भोको रहेको सुनाए ।
परिवारको सहयोगका कारण पनि आत्मविश्वास बढेको जनाउँदै उनले भने, ‘उमेर बढ्दै गए पनि म अझै पनि उपाधिको भोको छु, मेरो परिवारले उपाधि जित्ने मेरो इच्छाशक्तिलाई बढाउँदै छन् । उनीहरूको सहयोगले गर्दा पनि मलाई अरूले रोक्न असम्भव छ ।’
अर्जेन्टिनाबाट कुनै पनि उपलब्धि हासिल गर्न नसकेका बेला समय नै खराबजस्तो लागेको बताउँदै अहिले भने शान्ति मिलेको सुनाए । पारिवारिक सहयोगका कारण नै आफ्नो उपाधि यात्रामा सम्भव भएको उनको भनाइ छ ।
मेसीले आफ्नो राष्ट्रका लागि एकपटक विश्वकप र दुई पटक कोपा अमेरिकाको उपाधि जितिसकेका छन् ।
यसैगरी उनले आगामी दुई वर्षपछि मेक्सिको, क्यानडा र अमेरिकामा संयुक्त रूपमा हुने विश्वकपमा भेट हुने भन्दै आफ्नो खेल करिअरका बारे पनि मुख खोलेका छन् ।
उनले भनेका छन्, ‘म खुसी छु, स्वस्थ छु । यही सक्षमताका आधारमा भन्नसक्छु कि २०२६ को विश्वकपमा अर्जेन्टिनासँगै हुन्छु ।’
