विराटनगर । दक्षिण एसियाली महिला फुटबलको महाकुम्भ महिला साफ च्याम्पियनसिपमा आज घरेलु टोली नेपालले आफ्नो पहिलो खेल खेल्दै छ ।
त्रिपुरेश्वरस्थित दशरथ रंगशालामा हुने खेलमा नेपालले भुटानसँग खेल्दै च्याम्पियनसिपको सुरुवात गर्नेछ ।
समूह ‘बी’ मा रहेका नेपाल र भुटानबीचको खेल साँझ ५ः३० बजेबाट सुरु हुने छ ।
साविक उपविजेता नेपाल र भुटान भिड्नुअघि दिउँसो १ः३० बजे श्रीलंका र माल्दिभ्सले खेल्ने छन् ।
भुटानसँगको खेलमा नेपाली टोलीकी प्रभावशाली स्ट्राइकर सावित्री भण्डारी ‘साम्बा’ को अनुपस्थिति नेपाली टोलीलाई खड्किनेछ ।
फ्रान्सको एन एभेन्ट गेङगाम्पबाट व्यावसायिक फुटबल खेल्दै आएकी साम्बालाई क्लबले फुकुवा गर्न नमानेपछि पहिलो खेल गुमाउनु परेको हो ।
यद्यपि, उनी दोस्रो खेलपछि टोलीमा आबद्ध हुने मुख्य प्रशिक्षक राजेन्द्र तामाङले बताएका छन् ।
नेपाली महिला टोलीले भुटानविरुद्ध कहिल्यै हार बेहोर्न परेको छैन । हुन त भुटानसँग नेपालको भेट हुने भनेकै साफमा मात्रै हो ।
अहिलेसम्म यो टोलीसँग भिड्दा नेपालले चार खेलमा २३ गोल गरेको छ । तर, भुटानले भने एक गोल पनि फर्काउन सकेको छैन ।
यस्तोमा भुटान नेपालका लागि सहज प्रतिद्वन्द्वी हुन सक्छ । तथापि, घरेलु टोली नेपालले पनि राम्रो तयारी गर्न पाएको छैन ।
अझ नेपालले दशरथ रंगशालामा अभ्यास गरेको भनेको एकदिन मात्रै हो ।
मुख्यप्रशिक्षक राजेन्द्र तामाङ पनि भुटानलाई कमजोरी टोली भने आँक्दैनन् । उनी भन्छन्,‘भुटानले राम्रो गरिरहेको छ । समूहमा भुटान राम्रो हो । विगत र अहिलेको भुटानमा धेरै फरक छ ।’
भुटानले ग्रास्ट रुटदेखि नै महिला फुटबललाई विशेष प्रथामिकतामा राखेको छ । उसले राष्ट्रिय टोलीको बेन्च स्ट्रोङ बनाउन यु–१४ देखि नै लिग गरिरहेको छ ।
त्यसैले भुटान यसपल्ट युवा टोली लिएर काठमाडौं आइपुगेको छ ।
तर, नेपाली टोलीमा भने उहीँ पुराना खेलाडी छन् । थपिएको भनेको एकमात्रै नयाँ खेलाडी हुन सजनी थोकर । पहिलो चरणमा १८ नयाँ खेलाडी बोलाएपनि समय कम हुँदा पुरानैलाई प्राथमिकता दिन परेको तामाङ बताउँछन् ।
कात्तिक १४ गतेसम्म सञ्चालन हुने च्याम्पियनसिपको समूह ‘ए’ मा साबिक विजेता बंगलादेश, भारत र पाकिस्तान रहेको छ ।
समूह ‘बी’ मा आयोजक नेपालसहित माल्दिभ्स, भुटान र श्रीलंका रहेका छन् ।
प्रतियोगिताको अनुमानित बजेट चार करोड ६० हजार आठ सय रुपैयाँ रहेको छ ।
नेपालमा लगातार तेस्रोपटक महिला साफ च्याम्पियनसिपको आयोजना हुँदै छ ।
नेपालले यसअघि सन् २०१९ मा विराटनगरमा र दुई वर्षअघि काठमाडौँमा महिला साफ आयोजना गरेको थियो ।
सन् २०१० देखि प्रत्येक दुई–दुई वर्षमा साफ च्याम्पियनसिप हुँदै आएको छ ।
