विराटनगर । साउदी अरबको अल नासर र स्पेनिस महारथी रियल मड्रिडबीच मैत्रीपूर्ण फुटबल हुने भएको छ ।
पोर्चुगिज स्ट्राइकर क्रिस्टियानो रोनाल्डोआबद्ध अल नासर र रियलबीच चालू सिजनको अन्त्यमा मैत्रीपूर्ण फुटबल हुन लागेको अन्तर्राष्ट्रिय मिडियाहरूले जनाएका छन् ।
आगामी रियाद सिजनमा मैत्रीपूर्ण खेल खेल्नका लागि क्रिस्टियानो रोनाल्डोको अल–नासरसँग छलफल हुने सम्भावना रहेको छ ।
साउदी प्रो लिग टोलीविरुद्ध खेल्नका लागि रियल म्याड्रिड एक प्रस्तावित क्लब हो । २०२४ को रियाद सिजन अक्टोबर १२ देखि सुरु भई २०२५ सम्म चल्नेछ ।
पत्रकार अब्दुलअजिज अल–ओसैमीका अनुसार, साउदी अरबको जनरल इन्टरटेनमेन्ट अथोरिटीका अध्यक्ष तुर्की अल–शेखले आगामी रियाद सिजनमा सम्भावित मैत्रीपूर्ण खेलबारे अल–नासरसँग छलफल गर्नेछन् ।
उनले रियल मड्रिडलाई विपक्षी क्लबको रूपमा प्रस्ताव गरेको रिपोर्टमा जनाइएको छ ।
यसै वर्षको सुरुमा, स्पेनिस मिडिया मार्काले रोनाल्डोआबद्ध अल–नारस र रियल मड्रिडबीचको सम्भावित खेल नयाँ स्यान्टियागो बर्नाबेउ स्टेडियममा हुने जनाएको छ ।
उक्त स्टेडियमको उद्घाटन चालु सिजनको अन्त्य र २०२५ बीचमा हुने अपेक्षा गरिएको छ ।
रियलका अध्यक्ष फ्लोरेन्टिनो पेरेज नासरसँगको खेल गराउन उत्सुक थिए ।
तथापि, रियल र नासरबीचको मैत्रीपूर्ण खेलबारे दुवै टोलीबाट आधिकारिक रूपमा जानकारी आएको छैन ।
तर, अब उक्त खेल भएमा रोनाल्डो पूर्वक्लब रियलविरुद्ध मैदान उत्रिने छन् भने रोनाल्डोका फ्यानसमेत रहेका किलियन एम्बाप्पेले उनीविरुद्ध खेल्नु पर्ने छ ।
रोनाल्डो पुगेपछि नै अल नासरले गत वर्ष फ्रान्सेली क्लब पेरिस सेन्ट जर्मेन (पिएसजी) सँग मैत्रीपूर्ण खेल खेलेको थियो ।
जसमा ब्राजिलियन स्ट्राइकर नेयमार र फ्रेन्च स्टार एम्बाप्पे रोनाल्डोको क्लबविरुद्ध मैदान उत्रिँदा मेसी भने टोलीमा थिएनन् ।
अल नासर र रियल मड्रिडबीच एकमात्र खेल भएको छ, जसमा साउदी क्लबले जित निकालेको छ ।
सन् २००८ मा भएको मैत्रीपूर्ण खेलमा घरेलु टोली नासरले रियललाई ४–१ गोलले हराएको थियो ।
७० हजार दर्शकबीच खेलाइएको खेलमा रियलका रामोस, मार्सेलो, क्यासिलास जस्ता चर्चित खेलाडी सामेल थिए ।
तथापि, अहिले भने रियलको टोली बलियो अवस्थामा रहेका कारण नासरमाथि हाबी हुन सक्ने आँलकन गरिएको छ ।
पोर्चुगिज कप्तान क्रिस्टियानो रोनाल्डो सन् २००९ देखि २०१८ सम्म रियल मड्रिडका लागि व्यवसायिक फुटबल खेलेका थिए ।
नौ वर्षको अवधिमा उनले पाँच वर्षको अवधिमा चार पटक च्याम्पियन्स लिगमात्र जितेनन्, व्यक्तिगत अवार्डतर्फ चारवटा बालोन डी‘ओर पनि उचाले ।
स्पेन आउनुअघि नै इंग्ल्यान्डको म्यानचेस्टर युनाइटेडबाट उनले एउटा च्याम्पियन्स लिग र एउटा बालोन डी‘ओर जितिसकेका थिए ।
रियलबाट सबैखाले प्रतियोगिता गरी ४३८ खेल खेल्दा रोनाल्डोले ४५० गोल र १३१ गोलमा आफ्नो योगदान दिएका छन् ।
रियलबाट कुल १६ वटा उपाधि जितेका रोनाल्डो पारिश्रमिक विवादलगायत थुप्रै समस्याका कारण १० जुलाई २०१८ मा रियल छोडेर इटालियन क्लब युभेन्टस पुगेका थिए ।
