विराटनगर । फिफा विश्वकप छनोट खेलमा अर्जेन्टिनाले सनसनीपूर्ण जित निकाल्दा ह्याट्रिक गोल गरेका कप्तान लियोनल मेसीले क्रिस्टियानो रोनाल्डोको कीर्तिमानसँग बराबरी गरेका छन् ।
बुधबार बिहान भएको खेलमा अर्जेन्टिनाले घरेलु मैदानमा बोलिभियामाथि ६–० गोलान्तरको फराकिलो जित निकालेको थियो ।
जसमा ह्याट्रिकसहित कुल पाँच गोलमा योगदान गरेका मेसीले आफ्ना चिरप्रतिद्वन्द्वी क्रिस्टियानो रोनाल्डोको कीर्तिमानसँग बराबरी गरेका छन् ।
३७ वर्षीय मेसीले अन्तर्राष्ट्रिय खेलमा १० पटक ह्याट्रिक गरेका छन् ।
यसअघि पोर्चुगिज स्ट्राइकर रोनाल्डो अन्तर्राष्ट्रिय खेलमा सर्वाधिक धेरै १० वटा ह्याट्रिक गर्ने एकमात्र खेलाडी थिए ।
अब, आफ्नो राष्ट्रका सबैभन्दा धेरै ह्याट्रिक गर्ने खेलाडीका रूपमा मेसी पनि थपिएका छन् ।
पछिल्लो दुई दशकयता विश्व फुटबलमा प्रभावशाली सक्रियता देखाइरहेका मेसी र रोनाल्डो करिब–करिब खेल करिअरको अन्त्यतिर छन् ।
अन्त्यसम्ममा यो रेकर्ड कसको नाममा रहला, त्यो भने हेर्न बाँकी छ ।
यता, समग्रमा ह्याट्रिक गोलमा भने रोनाल्डो अगाडि छन् ।
३९ वर्षीय रोनाल्डोले क्लब र राष्ट्रका लागि विभिन्न प्रतियोगितामा ६६ पटक ह्याट्रिक गोल गरेका छन् ।
अल नासरका स्टार स्ट्राइकर रोनाल्डोले म्यानचेस्टर युनाइटेड, रियल मड्रिड, युभेन्टसलगायत क्लबबाट ५६ ह्याट्रिक गोल गरेका छन् ।
हाल अमेरिकन क्लब इन्टर मायामीका लागि व्यावसायिक फुटबल खेलिरहेका मेसीले बार्सिलोना, पिएसजीलगायत क्लबबाट ४८ ह्याट्रिक गोल गरेका छन् ।
पाँच पटकका बालोन डी‘ओर विजेता मेसीलेसबै प्रतियोगिता गरी ५८ ह्याट्रिक गोल गरेका छन् ।
सन् २००५ मा अर्जेन्टिनाका लागि डेब्यु गरेका मेसीले राष्ट्रिय टोलीमा १८७ खेलमा १०९ गोल गरेका छन् ।
समग्रमा मेसीले ८४६ गोल गरेका छन् ।
उनका प्रतिद्वन्द्वी मानिने रोनाल्डोले कुल ९०६ गोल गरेका छन्, जुन फुटबल इतिहासमा सबैभन्दा बढी गोल हो ।
