विराटनगर । फ्रान्सले युईएफए नेसन्स लिगमा सोमबार बेल्जियममाथि रोमाञ्चक जित निकालेको छ ।
सोमबार राति भएको खेलमा रान्डल कोलो मुनिको दुई गोलको मद्दतले फ्रान्सले बेल्जियममाथि २-१ गोलको जित निकालेको हो ।
बेल्जियमको मैदानमा फ्रान्सलाई जिताउन कोलो मुनिले दुई गोल गर्दा बेल्जियमका लागि लेस ओपेन्डाले एक गोल गरे ।
खेलको अन्तिम १४ मिनेट फ्रान्सले १० खेलाडीमा सीमित रहेर खेलेको थियो । अरेलिन चोमेनी दोस्रो पहेँलो कार्डमा मैदान छाड्न बाध्य रहे ।
खेलको ३५औं मिनेटमा पेनाल्टीमा गोल गर्दै कोलो मुनिले फ्रान्सलाई अग्रता दिलाए । पहिलो हाफको इन्ज्युरी समयमा ओपेन्डाले बराबरी गोल गरे ।
निर्णायक गोल भने ६२ औं मिनेटमा सम्भव भएको थियो ।
जितसँगै लिग ए ग्रुप टुको दोस्रो स्थानमा रहेको फ्रान्सले चार खेलमा ९ अंक जोडेको छ । बेल्जियम चार अंकसहित तेस्रो स्थानमा छ ।
गए राति नै भएको अर्को खेलमा इटालीले इजरायललाई सजिलै ४–१ ले पराजित गर्यो ।
