नेपालगन्ज । बर्दियाको गुलरिया नगरपालिकामा भारतीय वनकर्मीको गोली प्रहारबाट खेतमा काम गरिरहेका एक नेपाली घाइते भएका छन् ।
गुलरिया-८ आशापुरस्थित नेपाल-भारत सिमानामा आइतबार राति भएको गोली प्रहारबाट स्थानीय बलराम लोध घाइते भएका हुन् ।
हिजो राति करिब ७ बजे खेतमा काम गरि रहेको समयमा गुलरिया-८ आशापुरका लोधमाथि गोली प्रहार भएको जानकारी आएको सशस्त्र प्रहरी बल ३१ नम्बर गण बर्दियाले जनाएको छ ।
लोधलाई गोली लागेको घटना राति ८ बजे प्रहरीलाई आफन्तले जानकारी गराएका थिए ।
घाइतेलाई तत्काल उपचारका लागि जिल्ला अस्पताल गुलरियामा पुर्याइएको थियो ।
उनको उपचार त्यहाँ सम्भव नभएपछि बाँकेको कोहलपुरस्थित नेपालगन्ज मेडिकल कलेजको शिक्षण अस्पताल पुर्याइएको थियो ।
प्रहरीका अनुसार गोली कसले चलायो भन्ने बारेमा अनुसन्धान भइरहेको छ ।
तर, घाइते लोधले भने भारतीय वनकर्मीले उनमाथि गोली चलाएको बयान दिएका छन् । उनको ढाडमा गोलीको छर्रा लागेको प्रहरीले जनाएको छ ।
सो घटनाका बारेमा थप अनुसन्धान भइरहेकोले गोली कसले र किन चलायो भन्ने बारेमा अहिलेनै यकिनका साथ केही भन्न नसकिने प्रहरीको भनाइ छ ।
