विराटनगर । ब्राजिलले सर्वाधिक छैटौं पटक फिफा फुटसल विश्वकपको उपाधि जितेको छ । आइतबार राति भएको फाइनल खेलमा अर्जेन्टिनालाई २–१ गोलले हराउँदै ब्राजिलले विश्वकप जितेको हो ।
आइतबार राति उज्वेकिस्तानको तासकेन्टमा भएको उपाधि भिडन्तमा ब्राजिललाई जिताउन फेराओ र राफेलले एक–एक गोल गरेका थिए । अर्जेन्टिनाका लागि माटिआस रोसाले गरेको गोल भने सान्त्वना बन्यो ।
फुटबलको सर्वोच्च निकाय फिफाले आयोजना गर्दै आएको फुटसल विश्वपकको उपाधि ब्राजिलले जितेको यो छैटौं पटक हो ।
यसअघि ब्राजिलले पहिलो, दोस्रो र तेस्रो गरी लगातार तीन संस्करण उपाधि हत्याएको थियो । त्यसबाहेक सन् २००८ र २०१२ मा पनि ब्राजिलले फुटसलतर्फ विश्व च्याम्पियन बन्न सफल भएको थियो ।
