हेटौंडा । मकवानपुरको इन्द्रसरोवर गाउँपालिका–३ टेकरस्थित वत्सला माविमा पढ्ने एन्फा एकेडेमीमा ६ जना विद्यार्थी पहिरोले बगाएर बेपत्ता भएका छन् ।
शनिबार रातिदेखि परेको अविरल वर्षापछि आएको पहिरोले एकेडेमीमा बस्दै आएका विद्यार्थीलाई शनिबार बगाएर बेपत्ता भएको जिल्ला प्रहरी कार्यालय मकवानपुरले जनाएको छ ।
एन्फाले मकवानपुरको ईन्द्रसरोवर गाउँपालिका-३ स्थित वात्सल्यदेवी उच्च माध्यमिक विद्यालयमा सञ्चालन गरिरहेको आवासीय व्यवस्थासहितको प्रशिक्षण केन्द्रमा रहेका ६ जना खेलाडीहरू क्रमश: दिवस बाँनिया, प्रियान्स आचार्य, साइमन योञ्जन, अनुपम घलान, विकल रेग्मी, आदिप्य वालमपाकी शनिबार बिहान करिब ६:३० बजे उक्त स्थानबाट अन्यन्त्रतर्फ लाग्ने क्रममा पहिरोमा परेका हुन् ।
बेपत्ता ६ मध्ये तीन जनाको शव भेटिएको र तीन बेपत्ता रहेका मकवानपुर जिल्ला फुटबल संघका अध्यक्ष टिकाराम लामाले जानकारी दिएका छन् । तथापि, फेला परेको शवको सनाखत हुन सकेको छैन ।
यता, जिल्ला प्रहरी कार्यालय मकवानपुरका प्रहरी निरीक्षक ठाकुरप्रसाद सापकोटाले शनिबार बिहान उक्त घटना भएको जानकारी दिए ।
वत्सला मावि एन्फा एकेडेमीका करिब ४० जना विद्यार्थी होस्टेलमा बस्ने गरेका थिए ।
उनकाअनुसार घटनाभएको खबर प्राप्त भए प्रहरी घटनास्थलमा पुगेको पनि वर्षाको कारण उद्धार तथा खोजी कार्यमा कठिनाइ भइरहेको छ ।
एकेडेमीका अरू विद्यार्थी सकुशल रहेका छन् ।
विद्यार्थीहरूको उद्धार एवम् खोजीका लागि इलाका प्रहरी कार्यालय भीमफेदीबाट प्रहरी निरीक्षकको नेतृत्वमा नौ जनाको टोली घटनास्थलमा गएको छ ।
घटनास्थल प्रहरी चौकी सिस्नेरीबाट करिब दुई दुई किमी पश्चिममा रहेको छ ।
