विराटनगर । मोरङको ग्रामथान गाउँपालिकामा प्रथम संस्करणको रविदानन्द चौधरी स्मृति कप, भेट्रान फुटबल प्रतियोगिता हुने भएको छ ।
नेताचोक टाइगर क्लबको आयोजनामा यही असोज २९ गतेदेखि कात्तिक ६ गतेसम्म उक्त प्रतियोगिता आयोजना हुने भएको हो ।
पब्लिक क्याम्पसका पूर्वप्रधानाअध्यापक रविदानन्द चौधरीको स्मृतिमा हुन लागेको प्रतियोगिताबारे शनिबार पत्रकार सम्मेलन गरी जानकारी दिइएको छ ।
ग्रामथान-स्थित नेताचोक टाइगर क्लबको कार्यालयमा आयोजित पत्रकार सम्मेलनमा ४० वर्ष कटेका पुराना फुटबलरहरू सम्मीलित ८ वटा क्लबहरूको सहभागिता रहने जानकारी दिइएको हो ।
नेताचोक टाइगर क्लबका सल्लाहकार ध्रुवकुमार श्रेष्ठले प्रतियोगिता ग्रामथान गाउँपालिका-७ गणेश माविको खेलमैदानमा आयोजना हुने बताए ।
उनका अनुसार आयोजक नेताचोक टाइगर क्लबसँगै विराटनगरको रंगशाला भेट्रान र विराट युनाइटेड, इटहरीको चर्च इसाइ युनाइटेड, बेलबारीको बोराबाँध भेट्रान, विराटचोकको विराट भेट्रान, बराहक्षेत्रको बराह भेट्रान र सुनसरीको जनता भेट्रान सहभागी हुने छन् ।
प्रतियोगिता फिफाको नकआउट फर्म्याटअनुसार हुने छ भने आठ टिमलाई दुई समूहमा विभाजन गरी दुबै समूहको विजेतहरूबीच फाइनल खेल खेलाइने छ ।
असोज २९ गते दिउँसो ३ बजे हुने उद्घाटन खेलमा आयोजक नेताचोक टाइगर क्लबले विराटनगरको विराट युनाइटेडसँग खेल्ने छ ।
नेताचोक टाइगर क्लब अध्यक्ष मुक्ति गच्छदारले प्रतियोगिता पशुपति बोर्डिङ स्कुलकी संस्थापक अध्यक्ष उषादेवी चौधरीको प्रायोजन तथा थारू कल्याणकारी समाजको सहप्रायोजनमा प्रतियोगिता हुने छ ।
आयोजक नेताचोक टाइगर क्लबका सचिव अविन गिरीले प्रतियोगिताका लागि अनुमानित बजेट कुल ५ लाख ५५ हजार खर्च हुने जानकारी दिए ।
उनका अनुसार विजेता टोलीले ३१ हजार र ट्रफी पाउने छ भने उपविजेता टोलीले २१ हजार पुरस्कार पाउने छ ।
फाइनल खेलको म्यान अफ द म्याचले ७ हजार पाउने छन् भने उत्कृष्ट खेलाडी र उत्कृष्ट गोलरक्षकले समान ५-५ हजार पाउने छन् ।
यस्तै, प्रत्येक खेलका म्यान अफ द म्याचले एक-एक हजार पाउने आयोजकले जनाएको छ ।
पत्रकार सम्मेलनमा बोल्दै हिसानको केन्द्रीय उपाध्यक्ष भेषराज पोखरेल, कोशी प्रदेश खेलकुद बोर्डका सदस्य प्रदीप भगतले प्रतियोगिताको सफलताको शुभकामना दिएका थिए ।
