विराटनगर । ब्राजिलको राष्ट्रिय टोलीले आगामी अक्टोबरमा हुने विश्वकप छनोटका दुई खेलका लागि टोलीको घोषणा गरेको छ ।
प्रशिक्षक डोरिभल जुनियरले शुक्रबार घोषणा गरेको टोलीमा सात जना फरवार्ड समावेश गरेका छन् ।
उक्त सात जनामा रियलका भिनिसियस जुनियर, रोड्रिगो र एन्ड्रिक पनि छन् ।
ब्राजिल लगातारको खराब नतिजापछि दबाबमा परेको छ । पछिल्ला चार खेलमध्ये ब्राजिलले एक जित मात्रै हासिल गर्न सफल भएको छ ।
छनोटको अंक तालिकामा आठ खेलबाट १० अंक जोडेको ब्राजिल पाँचौं स्थानमा छ । यसरी ब्राजिलले जितका लागि संघर्ष गरिरहँदा स्टार खेलाडी नेयमारको चरम अभाव खड्किएको छ ।
ब्राजिलले सन् २०२६ को विश्वकपमा छनोट हुनका लागि गरिरहेको संघर्षमा साथ दिन पनि पाएका छैनन्, नेयमारले ।
चोटका कारण मैदानबाहिर रहेका नेयमारले आगामी कति खेल गुमाउने हुन्, त्यसको अनुमान पनि छैन । किनकि, झन्डै एक वर्षयता उनले खेल्न त के प्रशिक्षणसमेत गर्न सकेका छैनन् ।
एसिएलको चोटका कारण उनी गत वर्ष टोलीबाट बाहिरिएका थिए ।
अक्टोबर १० मा चिलीविरुद्ध र त्यसको पाँच दिनपछि पेरुविरुद्ध ब्राजिलले घरेलु मैदानमा आक्रमण सुरु गर्ने अपेक्षा गरिएको छ ।
टोली:
गोलकिपर : एलिसन (लिभरपुल), बेन्टो (अल नासर), एडरसन (म्यानचेस्टर सिटी)
डिफेन्डरः डानिलो (युभेन्ट्स), भेन्डरसन (मोनाको), अबनेर (लियोन), गुइलेर्मे अराना (एट्लेटिको मिनिरो), ब्रेमर (युभेन्टस), एडर मिलिटाओ (रियल मड्रिड), ग्याब्रियल म्यागाल्हेस (आर्सनल), मार्क्विनहोस (पेरिस सेन्ट जर्मेन)
मिडफिल्डरः आन्द्रे (वोल्भरह्याम्पटन), ब्रुनो गुइमारेस (न्युक्यासल), गेर्सन (फ्लामेन्गो), लुकास पाक्वेटा (वेस्ट ह्याम)
फरवार्डः रोड्रिगो (रियल मड्रिड), एन्ड्रिक (रियल मड्रिड), भिनिसियस जुनियर (रियल मड्रिड), लुइज हेनरिक (बोटाफोगो), इगोर जिसस (बोटाफोगो), साविन्हो (म्यानचेस्टर सिटी), ग्याब्रियल मार्टिनेली (आर्सनल), राफिन्हा (बार्सिलोना)
