विराटनगर । नेपाली राष्ट्रिय टोलीका लेग स्पिनर सन्दीप लामिछानेले एक दिवसीय अन्तर्राष्ट्रिय अलराउन्डर वरीयतामा छलाङ मारेका छन् ।
अन्तर्राष्ट्रिय क्रिकेट काउन्सिल (आइसिसी) ले बुधबार सार्वजनिक गरेको पछिल्लो वरीयतामा सन्दीपले २२ स्थान सुधार गरेका हुन् ।
पूर्वकप्तानसमेत रहेका सन्दीप ४१औं स्थानमा उक्लिएका छन् ।
अलराउन्डर वरीयतामा नेपालका दीपेन्द्रसिंह ऐरी ४८औं, कुशल मल्ल ५१औं, सोमपाल कामी ५३ औं, करण केसी ७६औं, गुलशन झा ९०औं र ललित राजवंशी ९४औं स्थानमा छन् ।
दीपेन्द्र र कुशल ६ स्थान तल झरेका हुन् ।
यस्तै करणले ११, गुलशनले १३ र ललितले एक स्थान सुधार गरेका छन् ।
सोमपाल यथा स्थानमा छन् ।
वरीयताको शीर्षस्थानमा अफगानिस्तानका मोहम्मद नवी छन् ।
यस्तै, ब्याटिङतर्फ आसिफ शेख ७९औं, कुशल भुर्तेल ८०औं र रोहितकुमार पौडेल ८७औं स्थानमा छन् ।
रोहितको वरीयता यथावत् रहेको छ भनेआसिफ ११ र कुशल चार स्थान तल झरेका छन् ।
ब्याटिङतर्फ पाकिस्तानका बाबर आजम शीर्षस्थानमा छन् ।
बलिङतर्फ सन्दीप लामिछाने ४८औं, ललित राजवंशी ५२औं, दीपेन्द्रसिंह ऐरी ६४औं, करण केसी ८७औं र सोमपाल कामी ८८औं स्थानमा हुनुहुन्छ ।
बलिङमा सन्दीपको वरियता यथावत् छ भने ललित दुई, दीपेन्द्र एक र सोमपाल १३ स्थान तल झरेका हुन् । करणले चार स्थान सुधार गरेका छन् ।
एक दिवसीय अन्तर्राष्ट्रिय वरियतामा नेपाल एक स्थान तल खस्किएको छ । यसअघि १६औं स्थानमा रहेको नेपाल १७औं स्थानमा पुगेको हो ।
