विराटनगर । अस्ट्रेलियाको तास्मानियास्थित होवार्ट सहरमा आयोजित बहुसंस्कृतिक फुटबल प्रतियोगितामा नेपाली टोली च्याम्पियन बनेको छ ।
उक्त प्रतियोगितामा भुटान, नाइजेरिया, नेपाल र भियतनामलाई प्रतिनिधित्व गर्दै ६ टिम सहभागी थिए ।
जसमा टाकीन, भुटनिज कम्युनिटी एसोसिएसन अफ साउथर्न तास्मानिया (बिकास्ट) र अस्ट्रेलियन भुटनिज सोसाइटी अफ साउथर्न तास्मानिया (एबीएसएनटी) गरी तीन टिमले भुटानको प्रतिनिधित्व गरेका थिए ।
त्यस्तै नाइजेरियन टिम ‘इमोले’, नेपाली टिम नेपलिज फुटबल क्लब अफ तास्मानिया (एनएफसीटी) र भियतनामको प्रतिनिधित्व गर्दै गोल्डेन ड्रयागन एफसी प्रतियोगितामा सहभागी थिए ।
सहभागी टिम मध्यबाट नेपाललाई प्रतिनिधित्व गरेको टिम एनएफसीटी प्रतियोगितामा विजयी भएको एनएफसीटी क्लबका सचिव सुवास खतिवडाले जानकारी दिए ।
उहाँका अनुसार ६ टिम सहभागी भएको खेल दुई समूहमा विभाजन गरी खेलाइएको थियो । जसमा ग्रुप ‘ए’ बाट ग्रुप विजेताको रूपमा नेपाली टिम एनएफसीटी र ग्रुप ‘बी’ बाट भुटानी टिम ‘बीकास्ट’ फाइनल खेलमा भएको थियो ।
फाइनलमा १–० को अन्तरले नेपाली टिम विजयी भएको हो । विजयी नेपाली टिम एनएफसीटी ले २५ सय अस्ट्रेलियन डलरका साथै ट्रफी हात पारेको छ । दोस्रो हुने भुटानी टिम ‘बिकास्ट’ ले एक हजार अस्ट्रेलियन डलरका साथै ट्रफी पाएको छ ।
