विराटनगर । सेन्ट्रल एसियन भलिबल एसोसिएसन (काभा) महिला नेसन्स लिगको उपाधि यात्रामा नेपालका लागि भारत बाधक बनेको छ ।
त्रिपुरेश्वरस्थित राष्ट्रिय खेलकुद परिषद् (राखेप) कभर्डहलमा बुधबार भएको फाइनलमा नेपाललाई हराउँदै भारतले उपाधि जितेको हो ।
उपाधि भिडन्तमा भारतसँग नेपाल ३–२ को सेटमा पराजित भयो । निकै प्रतिस्पर्धात्मक खेलमा भारतले नेपालमाथि २३–२५, २५–१४, २२–२५, २५–२१, १५–५ को जित निकालेको हो ।
घरेलु कोर्टमा उपाधि चुम्ने नेपालको सपनामा भारत बाधक बनेको हो ।
अघिल्ला चार सेटमा उत्कृष्ट प्रदर्शन गरेको नेपाल अन्तिम सेटमा स्तब्ध बनेको थियो ।
नेपालले महिला भलिबलको फाइनलमा भारतलाई हराएर कुनै पनि उपाधि जित्ने मौका पाएको थियो ।
तर भारतले पाँचौँ सेटमा कुनै गल्ती नगरी सहज जित निकाल्यो ।
यसअघि लिग चरणको खेलमा नेपाले भारतलाई ३–२ को सेटमा हराएको थियो ।
महिला भलिबलमा नेपालले भारतलाई हराएको यो पहिलो पटक थियो ।
फाइनलमा भारतले नेपालसँग लिग चरणमा खेपेको हारको बदलासमेत लियो ।
नेपालले घरेलु कोर्टमा उपाधिको मुखमा पुगेर भारतलाई नतिजा सुम्पिएको यो दोस्रो पटक हो ।
नेपाल पाँच वर्षअघि १३औँ दक्षिण एसियाली खेलकुद (साग) को फाइनलमा पनि भारतसँग पराजित बन्दै रजतमा चित्त बुझाउन बाध्य भएको थियो ।
नेपालले मङ्गलबार भएको सेमिफाइनल खेलमा इरानलाई ३–० को सोझो सेटमा हराउँदै फाइनलमा स्थान बनाएको थियो ।
नेपालले इरानमाथि २५–२१, २८–२६, २५–२० को नतिजा निकालेको थियो ।
नेपालले इरानविरुद्ध लिग चरणमा खेपेको हारको बदला समेत लिएको थियो । लिग चरणमा नेपाल इरानसँग ३–२ को सेटमा पराजित भएको थियो ।
यता भारतले सेमिफाइनलमा श्रीलंकालाई ३–० को सोझो सेटमा हराउँदै फाइनलमा स्थान बनाएको थियो ।
भारतले श्रीलंकामाथि २५–१५, २५–१६, २५–२३ को जित निकालेको थियो ।
पाँच टोली सहभागी प्रतियोगितामा इरान तेस्रो भयो । बुधबार नै तेस्रो स्थानका लागि भएको खेलमा इरानले श्रीलंकालाई ३–० को सोझो सेटमा हराएको थियो ।
इरानले श्रीलंकामाथि २५–२२, २८–२६ , २५–१७ को नतिजा निकालेको थियो । पाँच टोली सहभागी यस प्रतियोगितामा माल्दिभ्स भने लिग चरणका सबै खेलमा हार खेप्दै बाहिरिएको थियो ।
