विराटनगर । जर्मनीमा जारी युइएफए युरो कपको उपाधिका लागि स्पेन र इंग्ल्यान्ड भिड्ने पक्का भएको छ।
बुधबार राति भएको दोस्रो सेमिफाइनलमा नेदरल्यान्ड्सलाई हराउँदै इंग्ल्यान्डले फाइनलमा स्थान बनाएसँगै उपाधि भिडन्तका लागि टोलीको टुंगो लागेको हो।
यसअघि पहिलो सेमिफाइनल खेलमा फ्रान्समाथि २-१ गोलको जित निकाल्दै स्पेन उपाधिनजिक पुगिसकेको छ।
अब, आइतबार राति १२ः४५ बजे उपाधिका लागि स्पेन र इंग्ल्यान्ड आमनेसामने हुने छन् ।
गएराति भएको खेलको दोस्रो हाफको इन्ज्युरी समयमा ओली वाटकिन्सले गोल गर्दै इङ्ल्यान्डलाई लगातार दोस्रो पटक युरो कपको फाइनलमा पुर्याएका हुन्।
सिग्नल इडुना पार्कमा नेदरल्यान्ड्सलाई २-१ गोलअन्तरले पराजित गर्दै इङ्ल्यान्ड लगातार दोस्रो पटक उपाधिनजिक पुगेको हो।
नेदरल्यान्ड्सले खेलको सातौं मिनेटमै खेलमा सुरुआती अग्रता लिएको थियो। जावी सिमोन्सले डिबक्स बाहिरबाट गरेको प्रहार गोलमा परिणत भएको थियो। उनको यो युरो कपको पहिलो र अन्तर्राष्ट्रियतर्फ दोस्रो गोल हो।
तर, १८औं मिनेटमा ह्यारी केनले गोल गर्दै इङ्ल्यान्डलाई खेलमा फर्काए। हाफ भली प्रहार गर्नेक्रममा इङ्ल्यान्डका कप्तान केनलाई डेनजेल डम्फ्रिजले फउल गर्न पुगेका थिए।
जर्मनीका रेफ्री फेलिक्स ज्वायरले भिडियो असिस्टेन रेफ्री (भिएआर)को मद्दत लिँदै इङ्ल्यान्डलाई पेनाल्टी प्रदान गरेका थिए। उक्त पेनाल्टीलाई केनले सदुपयोग गरेका हुन्। योसँगै डम्फ्रिजले पहेंलो कार्ड पाए।
खेल बराबरीतर्फ उन्मुख थियो। तर, दोस्रो हाफको इन्ज्युरी समयको पहिलो मिनेटमा ओलीले गोल गर्दै इङ्ल्यान्डलाई जित दिलाए। उनले कोल पाल्मरको पासमा गोल गरेका हुन्।
