विराटनगर । फिफा विश्वकप २०२६ तथा एएफसी एसियन कप २०२७ अन्तर्गत दोस्रो चरणको छनोटमा नेपालले यमनसँग बराबरी खेलेको छ ।
बुधबार बिहान साउदी अरेबियामा भएको खेलमा यमनसँग २-२ गोलको बराबरी खेलेको नेपाल अंकबिहीन हुनबाट जोगिएको छ ।
यमनका नासिर अहमेद र मोहमद दानीले एक-एक गोल गर्दा नेपालका सञ्जीव विष्ट र जिलेस्पीजंग कार्कीले एक-एक गोल गरे ।
यमनले अहमेदले नवौं मिनेटमा गरेको पेनाल्टी गोलबाट अग्रता लिएको थियो । तर, नेपालका लागि सन्जिव विष्टले २२ औं मिनेटमा गोल गरेपछि पहिलो हाफ एक-एक गोलको बराबरीमा सकियो ।
जिलेस्पीजंग कार्कीले ६६ औं मिनेटमा गोल गरेपछि खेलमा नेपालले अग्रता लिएको थियो । तर, नेपाल अन्तिम समयमा सम्हालिन सकेन ।
यमनका सब्सिच्युट खेलाडी मोहमद दानीले दोस्रो हाफको इन्जुरी समयको पहिलो मिनेटमा बराबरी गोल गरे ।
खेलमा नेपालका कप्तान किरणकुमार लिम्बूले नेपालका लागि सयौं खेल पूरा गरे । यससँगै नेपालका लागि सयौं क्याप जित्ने पहिलो खेलाडी बन्न सफल भए ।
छनोटमा नेपाल समूह ‘एच’ मा चौथो भयो । नेपालले युएई र बहराइनविरुद्धका दुवै खेल गुमायो ।
यमनविरुद्धको पहिलो खेलमा पनि नेपाल पराजित भएको थियो । अन्तिम खेलमा यमनसँग बराबरी खेल्दा नेपाल अंकबिहीन हुनबाट जोगियो ।
नेपालले ६ खेलमा २० गोल खदा २ गोल गर्न सफल भयो । सुरुवाती पाँच खेलमा नेपालले पाँचै खेल हार्दा १८ गोल खाएको थियो भने कुनै गोल गर्न सकेको थिएन ।
