विराटनगर । आइसिसी टी–२० विश्वकपको बहुप्रतीक्षित खेलमा भारतले पाकिस्तानलाई पराजित गरेको छ ।
आइतबार राति भएको समूह चरणको खेलमा भारत ६ रनले विजयी भएको हो ।
नसाउ कन्ट्री इन्टरनेसनल स्टेडियममा भारतले दिएको एक सय २० रनको लक्ष्य पछ्याएको पाकिस्तानले निर्धारित २० ओभरमा सात विकेट गुमाउँदै एक सउ १३ रन मात्रै बनायो ।
पाकिस्तानका ओपनर मोहम्मद रिजवानले सर्वाधिक ३१ रन बनाए भने इमाद वसिम १५ रनमा आउट हुँदा बाबर आजम, उस्मान खान र फखर जमानले समान १३ रर बनाए ।
भारतका जसप्रीत बुमराहले सर्वाधिक तीन विकेट लिए । त्यसअघि नासाउ काउन्टी अन्तर्राष्ट्रिय क्रिकेट स्टेडियममा टस हारेर पहिला ब्याटिङ थालेको भारतले १९ ओभरमा सबै विकेट गुमाउँदै एक सय १९ रन बनाएको थियो ।
भारतका ऋषभ पन्तले सर्वाधिक ४२ रन बनाए भने अक्षर पटेल २० र कप्तान रोहित शर्मा १३ रनमा आउट हुँदा अन्यले दोहोरो अंकमा रन बटुल्न सकेनन् ।
हारिस रउफ र नसिम शाहले समान तीन विकेट लिए । मोहम्मद आमिरले दुई र शाहिन शाह अफ्रिदीको नाममा एक विकेट रह्यो ।
यससँगै समूह ‘ए’ मा रहेको भारतले दुई खेलबाट चार अंक जोडेको छ । समान खेल खेलेको पाकिस्तान अंकविहीन छ ।
समूह चरणमा पाकिस्तान लगातार दुई खेलमा पराजित हुन पुगेको छ । पहिलो खेलमा पाकिस्तान आयोजक अमेरिकासँग पराजित भएको थियो ।
योसँगै पाकिस्तानको अन्तिम आठ सम्भावना कठिन बनेको छ ।
पहिलो खेलमा भारतले आयरल्याण्डलाई पराजित गरेको थियो । दुई खेल जितेको भारत समूहको शीर्ष स्थानमा छ ।
दोस्रो स्थानमा अमेरिका, तेस्रोमा क्यानडा, चौथोमा पाकिस्तान र पाचौंमा आयरल्याण्ड छन् ।
