विराटनगर । विश्वकप २०२६ को एसियन कप २०२७ छनोटअन्तर्गत दोस्रो चरणको खेलमा नेपाल युएईसँग पराजित भएको छ ।
साउदी अरबको दमामस्थित प्रिन्स मोहम्मद बिन फहद स्टेडियममा बिहीबार राति सम्पन्न खेलमा नेपाल ४-० गोल अन्तरले पराजित भएको हो ।
युएईको जितमा हरिब अब्दुल्ला सुहेलले दुई गोल गरे भने अली सालेह र हाजेम मोहम्मदले एक-एक गोल गरे ।
खेलको पहिलो हाफको १२ र १४औं मिनेटमा सुहेलले गोल गरेका थिए । ५३औं मिनेटमा सालेह र ७५औं मिनेटमा मोहम्मदले गर्दै युएईलाई सहज जित दिलाए ।
यसअघि पहिलो चरणको खेलमा पनि नेपाल युएईसँग ४-० गोल अन्तरले नै पराजित भएको थियो । समूह एचको शीर्ष स्थानमा रहेको युएईले पाँच खेलबाट शतप्रतिशत जितसहित १५ अंक जोडेको छ ।
बहराइन १० अंकसहित दोस्रो, यमन तेस्रो र नेपाल पुछारमा रहेको छ । यमनको चार अंक छ भने नेपाल अंकविहीन छ ।
