विराटनगर । आजभन्दा ठ्याक्कै एक दशकअघि नेपालले टी–२० विश्वकप क्रिकेटमा डेब्यु गर्दा सिंगो नेपाल क्रिकेटमय बनेको थियो ।
पारस खड्का, शक्ति गौचन, सोमपाल कामीलगायत खेलाडीले सन् २०१४ को विश्वकप खेलिरहँदा नेपाली क्रिकेट समर्थकमा छुट्टै उत्साह थियो ।
सोही विश्वकपलाई आधार मानेर नेपाली क्रिकेटले विकासको थप ढोका खोल्यो । क्रिकेट खेलाडीको निरन्तर लगावले नेपाललाई १० वर्षपछि पुन: विश्वकपको मैदानमा उतार्न सफल भएको छ ।
नेपाली क्रिकेट टोलीले एक दशक लामो ब्यग्र पखाईलाई मंगलबार अमेरिकाको डालासमा साकार पार्दैछ ।
नेपाली समयानुसार राति मंगलबार ९:१५ बजे डालासस्थित ग्रान्ड पिएरे मैदानमा नेदरल्यान्ड्ससँग प्रतिस्पर्धा गर्दै नेपालले दोस्रो पटक विश्वकप यात्रा तय गर्दैछ ।
समूह ‘डी’ अन्तर्गत नेपालले आफ्नो पहिलो खेल चिरपरिचित प्रतिद्वन्द्वी नेदरल्यान्ड्ससँग खेल्न लागेको हो ।
नेदरल्यान्ड्सँग खेल्नका लागि नेपाली टोली उत्साहित रहेको कप्तान रोहित पौडेलले बताएका छन् ।
‘१० वर्षमा हामीले फेरि मौका पाउँदै छौँ । नेदरल्यान्ड्ससँग खेल्नका लागि सबै खेलाडी शारिरिक र मानसिक रुपमा तयार छौँ । नेदरल्यान्ड्स ब्यालेन्स टोली हो । हामीले पटक पटक खेलिरहेकोले जित्नका लागि खेल्नेछौँ,’ रोहितले भन्नुभयो ।
दुवै टोली उस्तै रहेकोले जसले दबाब झेलेर खेल्छ उसैको जित हुने पनि बताउँदै उनले भने, ‘हामी राम्रो क्रिकेट खेल्ने प्रयास गर्नेछौँ । एक महिना देखि यहीको वातावरणमा रहेर तयारी गरिरहका छौँ । वेस्ट इन्डिजको तयारीले पनि केही हौसला थपेको छ । टी–२० मा सबै टोलीलाई अवसर बराबर जस्तै हुन्छ । राम्रो खेल्नेले जित्ने हो । आशा छ, हामी हरेक खेल राम्रो खेल्दै अगाडि बढ्नेछौँ ।’
डालासमा नेपाली समर्थकबाट पाउने मायाले टोलीलाई गप ऊर्जा दिनेपनि बताए । उनले हरेक खेलमा टसमा जित र हार सर्वेसर्वा नहुने भन्दै शीत र घामको अवस्थालाई हेरेर निर्णय गर्ने पनि बताए ।
नेपाल र नेदरल्यान्ड्सबिच हालसम्म भएको भिडन्तमा नेपाल केही बलियो देखिएको छ ।
यसअघि दुई टोलीबीच भएको १२ वटा टी-२० भिडन्तमा नेपालले ६ र नेदरल्यान्ड्सले ५ खेलमा जित निकालेको छ । एउटा खेल नतिजाविहीन बनेको थियो ।
नवौँ संस्करणको यस विश्वकपको समूह ‘डी’ मा नेपाल र नेदरल्यान्ड्ससँगै श्रीलंका, दक्षिण अफ्रिका र बंगलादेश रहेको छ ।
यस समूहमा सोमबार दक्षिण अफ्रिकाले श्रीलंकालाई ६ विकेटले हराउँदै विश्वकपमा सुखद् सुरुआत गरेको छ ।
दक्षिण अफ्रिकाल श्रीलंकालाई ७७ रनमा अलआउट गर्दै सहज जित निकालेको हो ।
नेपालले समूह चरणको दोस्रो खेल जेठ २९ मा श्रीलंकासँग अमेरिकाकै फ्लोरिडामा खेल्नेछ । नेपालले बाँकी खेल जेठ ३२ मा दक्षिण अफ्रिकासँग र असार २ मा बंगलादेशसँग सेन्ट भिसेन्टमा खेल्ने छ ।
२० टोलीको सहभागिता रहेको विश्वकपमा सहभागी टोलीलाई चार समूहमा विभाजन गरिएको छ । समूहका शीर्ष दुई टोली सुपर आठमा प्रवेश गर्नेछन् ।
