विराटनगर । विराटनगरका मनिष तिम्सिना राष्ट्रिय टोलीको गोलकिपर प्रशिक्षकमा नियुक्त भएका छन् ।
एएफसी गोलकिपिङ ‘ए’ डिप्लोमा लाइसेन्स हासिल गरेका तिम्सिनालाई अखिल नेपाल फुटबल संघ (एन्फा) ले शुक्रबार गोलकिपर प्रशिक्षकमा नियुक्त गरेको हो ।
एन्फाका महासचिव किरण राईले तिम्सिनालाई आज सातदोबाटोस्थित एन्फा कम्प्लेक्समा नियुक्तिपत्र प्रदान गरे ।
तिम्सिनाले विनोद डंगोलको स्थान लिएका छन् । डंगोलसँगको सम्झौता सकिएपछि एन्फाले तिम्सिनालाई गोलकिपर प्रशिक्षकमा नियुक्त गरेको हो ।
तिम्सिना एएफसी गोलकिपिङ ‘ए’ डिप्लोमा लाइसेन्स हासिल गर्ने पहिलो नेपाली हुन् ।
उनले आइलिग क्लब गोकुलम केरलाको गोलकिपिङ प्रशिक्षकको भूमिकासमेत निर्वाह गरिसकेका छन् ।
आइलिग टोलीमा कुनै पनि प्रशिक्षकका रुपमा आबद्ध भएका उनी पहिलो नेपाली हुन् ।
तिम्सिनाले खेलाडीका रूपमा थ्री स्टार, आरसिटी, हिमालयन शेर्पा, बाँसबारी, स्वयम्मु, ब्रिगेड ब्वाइजबाट खेलेका छन् ।
यस्तै, आजै एन्फाले चेतन घिमिरेलाई सहायक प्रशिक्षकमा नियुक्त गरेको छ । घिमिरेले प्रवेश कटुवालको स्थान लिएका हुन् ।
नेपाली टोलीले आगामी जुन ६ मा विश्वकप छनोटअन्तर्गत दोस्रो चरणको खेलमा युएईको सामना गर्ने छ ।
