विराटनगर । नेपाल क्रिकेट संघ (क्यान)ले सन्दीप लामिछानेलाई आइसिसी टी–२० विश्वकप २०२४ खेल्न अमेरिका र वेस्टइन्डिज पठाउने तयारी गरेको छ ।
जिल्ला अदालतको फैसला उल्टाउँदै उच्च अदालत पाटनले जबर्जस्ती करणी मुद्दामा सफाइ दिएपछि क्यानले सन्दीपलाई विश्वकप खेल्न पठाउने तयारी गरेको हो ।
राष्ट्रिय क्रिकेट टोलीका पूर्वकप्तान लामिछानेले बुधबार सफाइ पाएका थिए । उच्चले सफाइ दिएपछि खेलमा फर्कन पाउने गरी बुधबार नै क्यानले उनको निलम्बन फुकुवा गरेको थियो ।
फैसलापछि लामिछानेले आफूलाई फसाइएको बताउँदै अब क्रिकेटमै फर्किने बताएका छन् ।
‘धेरै तरिकाले फसाएर नभएको अपराधमा दोषी करार गरिएको थियो । अन्त्यमा हामी यहाँ आइपुगेका छौँ । यो फैसलाको सम्मान गर्छु,’ उनले भनेका छन् ।
नेपाली क्रिकेटलाई आफूले माथि पुर्याउने उनको भनाइ थियो ।
यता, क्यानका अध्यक्ष चतुरबहादुर चन्दले सन्दीपको निलम्बन फुकुवा भएको र विश्वकपमा टिममा समावेश गर्ने तयारी रहेको बताए ।
आइसिसीको नियमअनुसार मे २५ सम्म कुनै पनि टोलीले खेलाडी परिवर्तन गर्न सक्छ ।
सोहीअनुसार अमेरिकामा रहेको १५ सदस्यीय टोलीबाट एक खेलाडीको नाम फिर्ता लिँदै सन्दीपको नाम पठाउने योजना क्यानको छ ।
यसअघि काठमाडौं जिल्ला अदालतमा सन्दीपविरुद्ध बलात्कार मुद्दा दर्ता भएपछि क्यानले २३ भदौ ०७९ मा उनलाई राष्ट्रिय टोलीबाट निलम्बन गरेको थियो ।
२८ पुसमा २० लाख धरौटीमा थुनामुक्त भएपछि सन्दीप पुनः अन्तर्राष्ट्रिय क्रिकेटमा फर्किएका थिए । क्यानले १६ माघमा निलम्बन फुकुवा गरेको थियो । १५ फागुनमा सर्वाेच्च अदालतबाट अनुमतिसहित विदेशमा खेल्न जान पाएका थिए ।
१३ पुस ०८० मा जिल्ला अदालत काठमाडौंबाट बलात्कार मुद्दामा दोषी ठहर भएपछि क्यानले २६ पुसमा अनिश्चितकालका लागि राष्ट्रिय टोलीबाट निलम्बन गरेको थियो ।
अब भने सन्दीपलाई अन्तर्राष्ट्रिय खेलमा सहभागी हुन बाटो खुलेको छ ।
नेपाली टोली अहिले वेस्टइन्डिजमा अभ्यासमा व्यस्त छ । नेपालले सन्दीपलाई पठाउँदा अन्तिम १५ बाट एक जना खेलाडी भने बाहिर ल्याउनुपर्छ ।
