विराटनगर । चितवनको भरतपुरमा जारी प्रथम संस्करणको अन्तर प्रदेश राष्ट्रिय खेलकुदअन्तर्गत महिला फुटबलतर्फ कोशी प्रदेश फाइनलमा प्रवेश गरेको छ ।
बुधबार चितवनको भरतपुरस्थित बखान स्मृति रंगशालामा भएको पहिलो सेमिफाइनल खेलमा मधेश प्रदेशलाई २–० गोलले हराउँदै कोशी स्वर्ण पदकनजिक पुगेको हो ।
कोशीको जितमा प्रतीक्षा राईले दुई गोल गरिन् । गोलकर्ता राई नै म्यान अफ द म्याच बनेकी थिइन् ।
अब, कोशीले स्वर्णका लागि कर्णाली र सुदूरपश्चिम प्रदेशबीचको विजेता टोलीसँग स्वर्णका लागि खेल्ने छ ।
दोस्रो सेमिफाइनल खेल बिहीबार दिउँसो ३ बजे हुने छ । फाइनल खेल भने वैशाख १ गते दिउँसो २ बजे हुनेछ ।
यस प्रतियोगिता अन्तर्गत पुरुष फुटबलतर्फ पनि कोशी प्रदेश फाइनलमा प्रवेश गरेको छ ।
बुधबार मकवानपुरको हेटौंडा उपमहानगरपालिका-६ स्थित गौरीटार बहुउद्देश्यीय रंगशालामा भएको पहिलो सेमिफाइनल खेलमा सुदूरपश्चिमलाई २-० गोलले हराउँदै कोशी स्वर्णनजिक पुगेको हो ।
बागमती प्रदेश सरकार, सामाजिक विकास मन्त्रालय र प्रदेश खेलकुद विकास परिषद् बागमती प्रदेशले संयुक्त रूपमा आयोजना गरेको प्रतियोगिताको उद्घाटन आइतबार प्रधानमन्त्री पुष्पकमल दाहाल ‘प्रचण्ड’ले गरेका थिए ।
प्रतियोगिताअन्तर्गत महिला क्रिकेट शनिबार नै सुरु भएको थियो भने अन्य खेलका प्रतिस्पर्धा सोमबारबाट सुरु भएको थियो ।
पुरुष क्रिकेट चैत २८ गतेदेखि हुने छ। प्रतियोगिताको समापन समारोह गौरीटार रंगशाला हेटौंडामा वैशाख २ गते हुने छ ।
प्रतियोगितामा करिब २ हजार खेलाडी तथा अफिसियल सहभागी भएका छन् ।
प्रतियोगितामा एक सय ३६ स्वर्ण, एक सय ३६ रजत र एक सय ८४ कास्यका लागि प्रतिस्पर्धा हुँदै छ ।
प्रतियोगिताका स्वर्ण विजेताले पाँच हजार, रजतले चार हजार र कांस्य विजेता खेलाडीले तीन हजार रुपैयाँ हात पार्नेछन् ।
हरेक खेलका उत्कृष्ट खेलाडीलाई १० हजार नगदबाट पुरस्कृत गरिने भने टिम च्याम्पियनलाई चाँदीको रनिङ सिल्ड प्रदान गरिने छ । प्रतियोगिता सञ्चालन गर्न १२ करोड खर्च हुने आयोजकले जनाएको छ ।
