चितवन । चितवनको भरतपुरमा जारी प्रथम अन्तर प्रदेश राष्ट्रिय खेलकुद प्रतियोगितामा कोशी प्रदेशले पहिलो स्वर्ण पदक हात पारेको छ ।
सोमबार भएको तेक्वान्दो खेलको पुम्सेतर्फ कोशीकी सुशीला राईले गोल्ड हात पारेकी हुन् ।
तेक्वान्दो प्रशिक्षक कुलबहादुर गुरुङका अनुसार भरतपुर कबर्डहलमा भएको स्पर्धामा तीन खेलाडीमाथि जित हात पारेकी राईले स्वर्ण जितेकी हुन् ।
सुशीलाले स्वर्ण जित्दा बागमती दोस्रो भयो भने गण्डकी र लुम्बिनी क्रमशः तेस्रो र चौथो भए ।
महिलाको १८ देखि ३० वर्षसम्मको उमेर समूहमा राईले स्वर्ण दिलाएको प्रशिक्षक गुरुङले जानकारी दिए । उनका अनुसार तेक्वान्दोको पुम्सेका लागि कोशीबाट आठ जना खेलाडी चितवन आएका छन् ।
भरतपुरमा आइतबार प्रधानमन्त्री पुष्पकमल दाहाल ‘प्रचण्ड’ले उद्घाटन गरेको प्रतियोगितामा बागमती प्रदेश खेलकुद विकास परिषद्को आयोजनामा भइरहेको छ ।
भरतपुर महानगरपालिकाको समन्वयमा जारी प्रतियोगितामा सहभागिता जनाउन कोशीबाट दुई सय ५३ खेलाडी चितवन आएका छन् । प्रतियोगिता आगामी वर्षको वैशाख २ गते समापन हुने छ ।
