विराटनगर । सीपमूलक प्राविधिक जनशक्ति उत्पादन गर्ने उद्देश्यका साथ विराटनगरको शिक्षादीप कलेजमा इथिकल ह्याकिङ सम्बन्धी ३ दिने कार्यशाला सुरु भएको छ ।
कलेजमा आईतबारदेखि दोश्रो संस्करणको ३ दिने कोड क्याम्प तथा इथिकल ह्याकिङ वर्कशप सुरु भएको हो । विश्वबजारमा सुचना तथा प्रविधिको क्षेत्रमा बढ्दो दक्ष जनशक्तिको मागलाई दृष्टिगत गर्दै कलेजले आफ्ना विद्यार्थीहरुका निम्त्ति वर्कशपको आयोजना गरेको हो । वर्कशपमा कक्षा ११ मा कम्प्युटर साईन्स अध्ययनरत ३०० बढी विद्यार्थीहरुको सहभागिता रहेको छ । रोेजगारीको सुनिश्चितताका साथै विद्यार्थीहरुलाई स्वरोजगार समेत बनाउने उद्देश्यका साथ वर्कशप आयोजना गरिएको शिक्षादीप कलेजका प्रधानाध्यापक ज्ञानबहादुुर खडकाले बताए ।
काठमाण्डौंस्थित ‘कोड हिमालय’ नामक आईटी कम्पनीको प्राविधिक सहयोगमा कलेजले कक्षा ११ का विद्यार्थीहरुका निम्त्ति यो वर्कसप आयोजना गरेको हो । कलेजले यसअघि गत माघमा कक्षा १२ का विद्यार्थीहरुका निम्त्ति यसै प्रकृतिको आईटी कार्र्यशाला आयोजना गरेको थियो । दोश्रोपटक कक्षा ११ का निम्त्ति आईतबारबाट सुरु भएको वर्कशपमा भने विद्यार्थीहरुले बेवसाईट डेभलपमेन्ट, वेब डिजाइनिङ, साईबर सेक्युरिटी र ह्याकिङ कन्ट्रोल लगायतका बिषयमा प्राविधिक ज्ञान आर्जन गर्ने कोड हिमालयका साईबर सेक्युरिटी डिभिजन प्रमुख भरत बस्यालले बताए ।
कलेजमा आईतबारबाट सुरु भएको वर्कशपमा विद्यार्थीहरुले भने कोड हिमालयका प्रशिक्षकहरुबाट इथिकल ह्याकिङ सम्बन्धी आवश्यक ज्ञान आर्जन गर्नेछन् । विद्यार्थीहरुलाई प्रशिक्षणका निम्त्ति कोड हिमालयले शिक्षादीप कलेजलाई ४ जना प्रशिक्षकहरु उपलब्ध गराएको छ ।
