विराटनगर । विभागीय टोली त्रिभुवन आर्मी क्लबलाई हराउँदै चर्च ब्वाइज युनाइटेड काठमाडौंले इटहरी गोल्डकपको उपाधि हात पारेको छ ।
शनिबार इटहरी रंगशालामा सम्पन्न फाइनल खेलमा आर्मीलाई १-० गोलान्तरले हराउँदै चर्च ब्वाइजले १४औं संस्करणको इटहरी गोल्डकपको उपाधि हात पारेको हो ।
चर्च ब्वाइजका लागि राजेश परियारले निर्णायक गोल गरे । उनले खेलको ४ मिनेटमा गरेको गोल नै चर्च ब्वाइजलाई उपाधि जिताउन पर्याप्त बनेको हो ।
खेलको म्यान अफ दि म्याच चर्च ब्वाइजका राजेश परियार घोषित हुँदै नगद १० हजार प्राप्त गरे ।
खेलको विजेता चर्च ब्वाइजले नगद १० लाखसहित ट्रफी हात पारेको छ भने उपविजेता आर्मीले नगद पाँच लाखमा चित्त बुझाएको छ ।
