विराटनगर । म्यानचेस्टर युनाइटेड एफए कपको सेमिफाइनलमा पुगेको छ ।
घरेलु मैदान ओल्ड ट्राफोर्डमा आइतबार राति भएको खेलमा युनाइटेडले लिभरपुलमाथि ४-३ गोलान्तरको रोमाञ्चक जित हासिल गर्दै सेमिफाइनमा स्थान पक्का बनाएको हो ।
युनाइटेडको जितमा स्कट म्याकटोमिनी, एन्टोनी, मार्कस रासफर्ड र अमद डियालोले गोल गरे । लिभरपुलका एलेक्सिस मक्यालिस्टर, मोहम्मद सलाह र हार्भे एलियटले गोल गरे ।
खेलको १०औँ मिनेटमै युनाइटेडले स्कटको गोलमार्फत् अग्रता लिएको थियो । तर, पहिलो हाफ सकिँनै लाग्दा दुई गोल गर्दै लिभरपुलले खेलमा अग्रता बनायो ।
४४औँ मिनेटमा मक्यालिस्टरले लिभरपुलका लागि गोल गरे । पहिलो हाफको थप गरिएको समयमा सलाहले गोल गर्दै लिभरपुललाई २-१ को अग्रता दिलाए ।
तर, ८७औँ मिनेटमा एन्टोनीले गोल गर्दै युनाइटेडलाई खेलमा फर्काए । निर्धारित ९० मिनेटको खेल २-२ गोलको बराबरीमा सकिएको थियो। त्यसपछि खेल ३० मिनेटको अतिरिक्त समयमा धकेलिएको थियो ।
१०५औँ मिनेटमा हार्भेले गोल गर्दै लिभरपुललाई पुन: अग्रता दिलाए । तर, त्यसको सात मिनेटपछि नै रासफर्डले गोल गर्दै युनाइटेडलाई खेलमा फर्काउदा स्कोर ३-३ मा पुग्यो ।
यद्यपि, अतिरिक्त समयको इन्ज्युरी समयमा डियालोले गोल गर्दै युनाइटेडलाई ४-३ को जित दिलाए ।
गोल गरेको एक मिनेट बित्न नपाउँदै उनले रातो कार्ड पाएका थिए। उनी ८६औँ मिनेटमा मैदान छिरेका थिए ।
