विराटनगर । त्रिभुवन आर्मी क्लब विराटनगरमा जारी कोशी प्रदेश ट्रफी पेप्सी राष्ट्रिय टी–२० क्रिकेट प्रतियोगिताको सेमिफाइनलमा पुगेको छ ।
मोरङ क्रिकेट संघको आयोजनामा भइरहेको प्रतियोगिताअन्तर्गत मंगलबारको पहिलो खेलमा घरेलु टोली कोशी प्रदेशलाई हराउँदै आर्मी अन्तिम चारमा पुगेको हो ।
विराटनगरको बैजनाथपुर क्रिकेट रंगशालामा आर्मीले कोशीलाई ५ विकेटले पराजित गरेको हो ।
आर्मीसँग पराजित भएको कोशी प्रतियोगिताबाट बाहिरिएको छ । समूह ‘ए’ मा ४ खेल खेलेको कोशीले १ मा जित र ३ खेलमा पराजित बेहोर्यो ।
कोशी २ अंकका साथ तेस्रो स्थानमा रह्यो ।
आर्मीले भने लगातार ३ खेलमा जित हात पार्दै सेमिफाइनलमा स्थान बनायो ।
आमी ६ अंकका साथमा शीर्ष स्थानमा छ ।
आर्मीले अब एपिएफसँग बुधबार दिउँसो लिगको अन्तिम खेल खेल्ने छ ।
सबै ४ खेलेको कर्णाली दुई खेलमा जित र दुई खेलमा पराजय बेहोर्दै चार अंकका साथ दोस्रो स्थानमा छ ।
दुई खेलमा एक खेलमा जित र एक खेलमा पराजित भएको एपिएफ दुई अंकका साथ तालिकामा चौथो स्थानमा रहेको छ ।
आजको दोस्रो खेलमा प्रतियोगिताबाट बाहिरिसकेको बागमती प्रदेशले गण्डकी प्रदेशलाई चार विकेटले हराएको छ ।
जितसँगै बागमती समूह ‘बी’ मा तीन खेलमा एक खेलमा जित र दुई खेलमा पराजित हुँदै दुई अंकको साथ तेस्रो स्थानमा उक्लिएको छ भने गण्डकीले खेलेको चारै खेलमा पराजित अंकविहीन भएर घर फर्किएको छ ।
बुधबारको पहिलो खेल पुलिस र लुम्बिनी तथा दोस्रो खेल दुई विभागीय टोली आर्मी र एपिएफबीच खेल हुने मोरङ क्रिकेट संघका अध्यक्ष महमद साद बाबु कुरैसीले जानकारी दिए ।
