विराटनगर । मोरङ क्रिकेट संघको आयोजनामा विराटनगरमा जारी कोशी प्रदेश ट्रफी पेप्सी राष्ट्रिय टी–२० क्रिकेट प्रतियोगितामा नेपाल पुलिस र आर्मी विजयी भएका छन् ।
विराटनगरको बैजनाथपुर क्रिकेट रंगशालामा आइतबार भएको पहिलो खेलमा विभागीय टोली नेपाल पुलिसले गण्डकी प्रदेशलाई ४ विकेटले पराजित गरेको हो ।
जितसँगै पुलिस समूह ‘बी’ मा दुई खेलबाट दुई अंकको साथ तेस्रो स्थानमा उक्लिएको छ ।
गण्डकी भने खेलेको तीनवटै खेलमा पराजित हुँदै प्रतियोगिताबाट बाहिरिने पहिलो टिम बनेको छ ।
पुलिस पहिलो खेलमा सुदूरपश्चिमसँग पराजित भएको थियो ।
आजकै अर्को खेलमा आर्मीले मधेस प्रदेशलाई ७ विकेटले पराजित गरेको छ ।
आर्मीले लगातार दोस्रो जित निकाल्दै समूह ‘ए’ को शीर्ष स्थानमा उक्लिएको छ ।
आर्मीले यसअघि खेलेको पहिलो खेलमा कर्णालीलाई पराजित गरेको थियो ।
जितसँगै आर्मी दुई खेलमा दुई जित निकालेर चार अंकका साथ पहिलो स्थानमा छ ।
यता तीन खेलमा एक खेलमा जित र दुई खेलमा पराजित भएको मधेस दुई अंकका साथ चौथो स्थानमा यथावत रहेको छ ।
