विराटनगर । विराटनगरमा जारी कोशी प्रदेश ट्रफी पेप्सी नेसनल टी–२० क्रिकेट प्रतियोगितामा लुम्बिनी प्रदेश र कर्णाली प्रदेश विजयी भएका छन् ।
मोरङ क्रिकेट संघको आयोजनामा जारी प्रतियोगिताको दोस्रो दिन आज दुई खेल भएका थिए, जसमा लुम्बिनी र कर्णाली विजयी भएका हुन् ।
विराटनगरको बैजनाथपुर क्रिकेट रंगशालामा बुधबारको पहिलो खेलमा लुम्बिनी प्रदेशले सुदूरपश्चिम प्रदेशलाई ५८ रनले पराजित गर्यो ।
टस जितेर पहिले ब्याटिङ गरेको लुम्बिनीले निर्धारित २० ओभरमा ६ विकेट गुमाई एक सय ६८ रनको योगफल बनाएको थियो ।
लुम्बिनीका लागि विशाल विक्रम केसीले ३१ बलमा ४ छक्का र १ चौका प्रहार गरी ४८ रन बनाउँदा कप्तान देव खनालले २३ बलमा २ छक्का र ६ चौका प्रहार गरी ४५ रन र दिलसाद अलीले ३१ रनको योगदान दिए ।
सुदूरपश्चिमका नरेन साउदले दुई विकेट लिँदा हेमन्त धामी, दिपक बोहोरा र शेर मल्लले समान १–१ विकेट लिएका थिए ।
जवाफमा १ सय ६९ रनको लक्ष्य पाएको सुदूरपश्चिम १७ दशमलव १ बलमा सबै विकेट गुमाई १ सय ११ रनमा सीमित भयो ।
सुदूरपश्चिमका नरेन भट्टले सर्वाधिक १९ रन जोड्दा अविशेक पलले १८ रनको योगदान दिए ।
लुम्बिनीका म्यान अफ द म्याच निर्मल गुरुङले ३ विकेट लिँदा विर मगर र राहुल चौहानले २–२ विकेट लिए ।
यसअघि पहिलो खेलमा सुदूरपश्चिमले गण्डकी प्रदेशलाई ४० रनले पराजित गरेको थियो ।
दोस्रो खेलमा कर्णाली प्रदेशले मधेस प्रदेशलाई तीन विकेट पराजित गर्यो ।
टस जितेर ब्याटिङ गरेको मधेसले निर्धारित २० ओभरमा सबै विकेट गुमाई ९० रनमा खुम्चियो ।
मधेशका प्रदीप पासवानले सर्वाधिक १८ रन बनाउँदा अविशेक तिवारीले १२ रन,अरनिको यादवले ११ रन र राजेश यादवले नटआउट ११ रनको योगदान दिए ।
कर्णलीका म्यान अफ द म्याच दिवान पुनले ३ विकेट लिँदा दिनेश अधिकारी र अनुज चहरा २–२ विकेट लिए ।
जवाफमा ९१ को सामान्य लक्ष्य पछ्याएको कर्णालीले १५ दशमलव ४ बलमा ७ विकेट गुमाई लक्ष्य पार गरेको थियो ।
कर्णालीका लागि हिमान्सु शाहीले २६ बलमा ३ छक्का र ३ चौका प्रहार गरी ३४ रन बनाउँदा अर्जुन घर्तीले १४ रन र रविद्यन्र शाहीले १२ रनको योगदान दिए ।
मधेसका रन्जित कुमारले ३ विकेट लिँदा हरिशैकर साहले २ विकेट लिए ।
यसअघि कर्णाली कोशी प्रदेशसँग ३८ रनले पराजित भएको थियो ।
अब, बिहीबारको पहिलो खेल लुम्बिनी र गण्डकी तथा दोस्रो खेल काशी र मधेश प्रदेशबीच खेल हुने मोरङ क्रिकेट संघका अध्यक्ष महमद साख बाबु कुरैसीले जानकारी दिए ।
