विराटनगर । सुनसरी प्रतिनिधिसभा निर्वाचन क्षेत्र नम्बर ३ बाट निर्वाचित नेकपा एमालेकी भगवती चौधरी पुनः एकपटक मन्त्री बनेकी छन् ।
प्रधानमन्त्री पुष्पकमल दाहाल ‘प्रचण्ड’ नेतृत्वमा रहेको मन्त्रीमण्डलमा चौधरीले महिला, बालबालिका तथा ज्येष्ठ नागरिक मन्त्रालयको जिम्मेवारी पाएकी हुन् ।
गत संसदीय दलको निर्वाचनमा पाँच दलीय सत्ता गठबन्धनका साझा उम्मेदवार नेपाली कांग्रेसका नेता विजयकुमार गच्छदारलाई पराजित संसदीय यात्रा थालेकी उनी तेस्रो पटक मन्त्री बनेकी हुन् ।
यसअघि गत वर्षको माघ ३ गते नेकपा माओवादी केन्द्रका अध्यक्षसमेत रहेका प्रधानमन्त्री ‘प्रचण्ड’ नेतृत्वको मन्त्रीमण्डलमा उनी मन्त्री बनेकी थिइन् ।
माओवादीले एमालेसँगको सत्ता सहकार्य त्यागेर कांग्रेससँग गठबन्धन गरेपछि उनले राजीनामा दिएकी थिइन् ।
त्यसभन्दा अगाडि भने २०६४ सालको पहिलो संविधानसभामा समानुपातिक सांसद रहेकी उनी वन तथा भू-संरक्षण राज्यमन्त्री बनेकी थिइन् ।
विगतमा दुईवटा चुनाव ३ सयको झिनो मतान्तरले पराजित भएकी चौधरीले यो निर्वाचनमा भने गच्छदारलाई फराकिलो मतान्तरले हराउन सफल भएकी थिइन् ।
२०७० सालको दोस्रो संविधानसभाको निर्वाचन र २०७४ सालको संसदीय निर्वाचनमा गरी दुई पटक गच्छदारसँगको प्रतिस्पर्धामा पराजित भएकी चौधरीले तेस्रो प्रयासमा संसदको यात्रा तय गर्न सफल भएकी हुन् ।
२०७० सालको दोस्रो संविधानसभाको निर्वाचनमा गच्छदारसँग ३ सय ६२ मतले पराजित भएकी चौधरी ०७४ सालको निर्वाचनमा भने ३ सय २१ मतको झिनो मतान्तरले पराजित भएकी थिइन् ।
२०७४ को निर्वाचनमा गच्छदारले धाँधली गरेको भन्दै पुस ११ गते भगवती सर्वोच्चमा रिट दायर गरेकी थिइन्। उनले लतपतिएको र बदर मतसमेत रुख चिन्हमा गणना गर्न लगाएको आरोप लगाएकी थिइन् ।
मुद्दा परेको तेस्रो दिन १४ पुसमा संवैधानिक इजलासले कारण देखाऊ आदेश जारी गरेपछि संसद्को कार्यकाल सकिएर निर्वाचनको मिति तय हुँदासमेत फैसला नआएपछि भगवती पुनः मैदानमा उत्रिएकी थिइन् ।
को हुन् भगवती चौधरी ?
भगवती चौधरी सुनसरीको सामान्य किसान परिवारमा जन्मे, हुर्केर राजनीतिमा आएकी हुन् ।
जननेता स्वर्गीय मदन भण्डारीको आदर्शबाट अभिप्रेरित भएर राजनीतिमा लागेको बताउने चौधरीले २०४८ सालमा अनेरास्ववियुमा आबद्ध भएर राजनीतिक यात्रा सुरु गरेकी हुन् ।
सोही वर्ष उनले नेकपा एमालेको पार्टी सदस्यता लिएकी हुन् ।
५१ वर्षीय चौधरी लामो समयदेखि सामाजिक र आर्थिक क्षेत्रमा सक्रिय छिन् । उनको नेतृत्वमा फरवार्ड माइक्रोफाइनान्स लघुवित्त वित्तीय संस्था सञ्चालनमा छ ।
भगवतीले २०५१ सालमा फरवार्ड एनजिओ स्थापना गरेर लघुवित्त अभियानबाट सामाजिक कार्यमा सक्रिय भएकी थिइन्, उनी ।
त्रिभुवन विश्वविद्यालयबाट मानविकी तथा व्यवस्थापन विषयमा स्नातकोत्तरसम्मको अध्ययन गरेकी चौधरी लघुवित्तमार्फत महिलाको आर्थिक तथा सामाजिक विकासमा योगदान दिएर चर्चामा आएकी थिइन् ।
उनले एमालेको महिला संगठन अखिल नेपाल महिला संघमा समेत लामो समय काम गरेकी छिन् ।
२०५८ सालदेखि सक्रिय राजनीतिमा लागेकी उनी २०६४ सालमा नेकपा एमालेको सुनसरी जिल्ला समिति सदस्य बनेकी थिइन् ।
सोही वर्ष पहिलो संविधानसभा सदस्य भएकी उनी वन तथा भू-संरक्षण राज्यमन्त्रीसमेत भएकी थिइन् ।
२०७० सालमा कोसी अञ्चल समन्वय कमिटी सदस्य र २०७८ को चितवनमा सम्पन्न एमालेको १०औं महाधिवेशनबाट केन्द्रीय सदस्य भएकी छन् ।
