विराटनगर । नेपाल क्रिकेट फाउन्डेसनको आयोजनामा भएको तेस्रो संस्करणको इक्वालिटी कप महिला क्रिकेटको उपाधिका लागि मोरङ र इलाम भिड्ने भएका छन् ।
प्रतियोगितामा लगातार दुई खेलमा जित निकालेका मोरङ र इलामले शुक्रबार हुने फाइनल खेलमा उपाधिका लागि प्रतिस्पर्धा गर्ने भएका हुन् ।
बुधबार विराटनगर-६ मा रहेको ज्वाला क्रिकेट मैदानमा भएको पहिलो खेलमा इलामले सिरहालाई ४ विकेटले पराजित गर्दै फाइनलमा स्थान बनाएको हो ।
यसअघि पहिलो खेलमा इलामले सप्तरीलाई पराजित गरेको थियो । हारपछि सिरहा एक खेल खेल्नुअगाडि नै प्रतियोगिताबाट बाहिरिएको छ ।
दोस्रो खेलमा मोरङले सप्तरीलाई आठ विकेटले पराजित गर्दै फाइनलमा स्थान पक्का गरेको हो ।
मोरङले यसअघि पहिलो खेलमा सिरहालाई पराजित गरेको थियो । हारपछि सप्तरी एक खेलअगावै प्रतियोगिताबाट बाहिरिएको छ ।
मोरङ क्रिकेट संघको प्राविधि सहयोगमा भएको तेस्रो संस्करण इक्वालिटी कपको फाइनल खेल शुक्रबार हुने छ ।
भोलि बिहीबारको पहिलो खेल मोरङ र इलाम र दोस्रो खेल सप्तरी र सिराहाबीच हुने खेल संयोजक विशाल साहले बताए ।
