विराटनगर । घरेलु टोली नेपाललाई हराउँदै नेदरल्यान्ड्सले टी ट्वान्टी त्रिकोणात्मक सिरिजको उपाधि जितेको छ ।
मंगलबार भएको फाइनल खेलमा नेपाललाई हराउँदै नेदरल्यान्ड्सले त्रिकोणात्मक अन्तर्राष्ट्रिय टी-२० सिरिजको उपाधि उचालेको हो ।
नेदरल्यान्ड्स र नामिबियासम्मिलित सिरिजको फाइनलमा नेदरल्यान्ड्ससँग चार विकेटले पराजित भएसँगै नेपाल उपाधिबाट विमुख भएको छ ।
कीर्तिपुरस्थित त्रिवि क्रिकेट मैदानमा जितका लागि एक सय ८५ रनको लक्ष्य पछ्याएको नेदरल्यान्ड्सले १९.३ओभरमा ६ विकेटको क्षतिमा एक सय ८९ रन जोड्दै लक्ष्य पूरा गरेको थियो ।
नेदरल्यान्ड्सका लागि माइकल लेभिटले ५४ रनको अर्धशतकीय इनिङ्स खेले भने सेवार्ट इन्जेलब्रेचले ४८, विक्रमजित सिंहले २९, म्याक्स ओडोडले २२ र टिम भान डेरले अविजित २१ रन बनाए ।
बलिङमा नेपालका कुशल मल्लले चार विकेट लिए । अविनाश बोहरा, दीपेन्द्रसिंह ऐरीले एक विकेट लिए ।
त्यसअघि टस जितेर पहिले ब्याटिङ गरेको नेपालले निर्धारित २० ओभरमा आठ विकेटको क्षतिमा एक सय ८४ रन बनाएको थियो ।
नेपालका लागि आशिफ शेखले ४७ रन बनाउँदा गुलशन झाले ३४, कुशल मल्लले २६, कप्तान रोहित पौडेलले २५, कुशल मल्लले २५ र कुशल भुर्तेलले २० र करण केसीले नौ रन बनाए ।
बलिङमा नेदरल्यान्ड्सका टिम भा डियर, माइकल लेविट, सेवार्ट इन्जेलब्रेच र फ्रेड कासेनले दुई दुई विकेट लिए ।
नेदरल्यान्ड्सले भने नेपाल भ्रमणलाई उपाधिसहित सुखद बनाएको छ । नेपाल भने फाइनलमा स्तब्ध बनेको छ ।
नेपालले चार खेलको सिरिजमा दुई हार र दुई जितसहित चार अंक जोड्दै फाइनलमा स्थान बनाएको थियो ।
नेदरल्यान्ड्स चार खेलबाट पाँच अंक जोड्दै शीर्ष टोलीको रूपमा फाइनलमा पुगेको थियो ।
तीन अंक बनाएको नामिबिया बाहिरिएको थियो । नेपालले आइसिसी टी–२० विश्वकपको तयारी स्वरूप घरेलु मैदानमा त्रिकोणात्मक अन्तर्राष्ट्रिय टी–२० सिरिज खेलेको हो ।
