विराटनगर । विराटनगरमा मंगलबारदेखि सुरु हुने कोशी प्रदेश क्रिकेट प्रतियोगितामा म्यान अफ द म्याच हुने खेलाडीलाई क्युआरबाट भुक्तानी गरिने भएको छ ।
आयोजक मोरङ जिल्ला क्रिकेट संघ र एनआइसी एसिया बैंकबीच प्रतियोगितामा म्यान अफ द म्याच हुने खेलाडीहरूलाई क्युआरबाट भुक्तानी गर्ने सहमति भएको हो ।
सोमबार बैंकको तर्फबाट ब्रान्डिङ एन्ड कर्पाेरेट कम्युनिकेसनका प्रमुख सरोज भट्टराई र संघको तर्फबाट मोरङ अध्यक्ष महमद साद बाबु कुरेशीले सम्झौता गरेका छन् ।
म्यान अफ द म्याच हुने खेलाडीलाई कति राशि दिने त्यो भने मंगलबार तोकिने अध्यक्ष कुरेशीले बताए ।
डिजिटल माध्यमबाट पहिलोपटक खेलकुद क्षेत्रमा भुक्तानी गर्ने योजना ल्याएको उनले बताए ।
‘क्रिकेट व्यवस्थापनको विकासमा एउटा मेरुदण्डको रहेको हामीले बुझेका छौं । यसलाई सम्भव तुल्याउन एनआइसी एसिया बैंकको सदाचारी समर्थन हाम्रा लागि कोशेढुंगा सावित भएको छ,’ उनले भने ।
फागुन २२ गतेबाट चैत्र ३ गतेसम्म प्रतियोगिता विराटनगरको बैजनाथपुर रंगशालामा हुनेछ ।
प्रतियोगिताका विजेताले पाँच लाख रुपैयाँ र उपविजेताले ३ लाख रुपैयाँ प्राप्त गर्नेछ ।
सातवटा प्रदेशसँगै तीनवटा विभागीय टोलीबीच प्रतिस्पर्धा हुने प्रतियोगिताका लागि करिब ७५ लाख रुपैयाँ खर्च हुने उनको भनाई छ ।
लिग कम नकआउटको आधारमा खेल हुने आयोजकले बताए ।
