विराटनगर । मोरङको विराटनगर महानगरपालिकामा तेस्रो संस्करणको इक्वालिटी कप क्रिकेट हुने भएको छ ।
नेपाल क्रिकेट फाउन्डेसनको आयोजनामा हुने ‘इक्वालिटी कप क्रिकेट २०२४’ नाम दिइएको उक्त प्रतियोगिता भोलि मंगलबारदेखि आगामी तीन दिनसम्म हुने जनाइएको छ ।
आयोजक नेपाल क्रिकेट फाउन्डेसनले सोमबार विराटनगरमा पत्रकार सम्मेलनको आयोजना गरी यसबारे जानकारी गराएको हो ।
टी–२० फर्म्याटमा हुने सो प्रतियोगिता विराटनगर–६ केशलिया रोडनजिकै रहेको म्यारिलिबोन विराटनगर ज्वाला क्रिकेट मैदानमा हुने छ ।
महिला क्रिकेटको विकास र प्रवर्द्धन गर्ने हेतुले आयोजना गर्न आँटिएको प्रतियागितामा कोशी प्रदेश र मधेस प्रदेशका चार टोली महिलाको सहभागिता रहने आयोजक संस्थाका अध्यक्ष अभिषेक श्रेष्ठले जानकारी दिए ।
मोरङ जिल्ला क्रिकेट संघसँगको समन्वयमा हुने आँटेको उक्त प्रतियोगितामा
प्रतियोगितामा कोशी प्रदेशका मोरङ र इलाम तथा मधेस प्रदेशका सप्तरी र सिरहाको सहभागिता रहने छ ।
जिल्ला क्रिकेट संघले छनोट गरेर पठाएका खेलाडीहरूले प्रतिनिधित्व प्रतियोगितामा रहने उनको भनाइ छ ।
श्रेष्ठका अनुसार प्रतियोगितामा सहभागी टोलीले एक–अर्कासँग प्रतिस्पर्धा गर्ने छन् र अंक तालिकाको शीर्ष दुई टिम उपाधिका लागि भिड्ने छन् ।
बिहान १० बजे र दिउँसो १ बजे गरी प्रतियोगितामा हरेक दिन दुई खेल हुने छन् ।
पहिलो दिन बिहान १० बजे मोरङ र सप्तरीले प्रतिस्पर्धा गर्ने छन् भने दोस्रो खेलमा इलाम र सिरहा भिड्ने छन् ।
बुधबार पहिलो खेलमा सप्तरी र इलामले प्रतिस्पर्धा गर्दा दोस्रो खेलमा सिरहा र मोरङ आमने–सामने हुने छन् ।
तेस्रो दिन अर्थात् बिहीबारको पहिलो खेलमा मोरङ र इलाम तथा दोस्रो खेलमा सप्तरी र सिहराबीच हुने छ ।
प्रतियोगिताको फाइनल खेल भने अन्तर्राष्ट्रिय महिला दिवसको दिन हुने छ ।
विराटनगर महानगरपालिका र मोरङ क्रिकेट संघ प्रवर्द्धक संस्था रहेको यस प्रतियोगिता सम्पन्न गर्न पाँच लाख रुपैयाँ लाग्ने बताइएको छ ।
‘विशेषरी महिला दिवसको अवसर पारेर महिला क्रिकेटको विकास, प्रवर्द्र्धन र उत्थान गर्ने उद्देश्य लिएर यो प्रतियोगिता गर्न लागेका हौं,’ अध्यक्ष श्रेष्ठले भने, ‘यसका लागि तयारी पूरा भइसकेको छ । भोलिबाट हुने प्रतियोगिताबाट थुप्रै नवप्रतिभाहरूलाई प्रोत्साहन पुग्ने छ ।’
मुलुकमा महिला क्रिकेट प्रतियोगिता ज्यादै न्यून संख्यामा हुने भएकोले त्यसलाई ध्यानमा राखि राष्ट्रियस्तरमा दक्ष खेलाडी उत्पादनमा सहयोग पुर्याउन खेलको आयोजना गरिएको अध्यक्ष श्रेष्ठले बताए ।
कोशी र मधेस प्रदेशका महिला खेलाडीहरूको प्रतिभा पहिल्याउन पनि प्रतियोगिताको आयोजना गर्न आँटिएको फाउन्डेसनका अध्यक्ष श्रेष्ठले बताए ।
समाजमा व्याप्त लैंगिक विभेद अन्त्य गर्न पनि यो प्रतियोगिता आवश्यक रहेको उनको ठम्याइ छ ।
फाउन्डेसनका सदस्य विशाल साहले विभिन्न देशबाट महिला क्रिकेटको प्रवर्द्र्धन गर्ने उद्देश्यले क्रिकेट विथआउट बाउन्ड्रीले खेलाडीहरूलाई आवश्यक ‘टेक्निक’ सिकाउने बताए ।
उनका अनुसार स्वयम्सेवक प्रशिक्षकका रूपमा नेपाल आएको टोलीले रचना रामचन्दन, एच लाम्ब, काउप्रेडीलगायत ६ जनाको टिमले स्वयमसेवकका रूपमा प्रतियोगिता सहभागी हुने महिला क्रिकेटरलाई सिकाउने छन् ।
स्वयमसेवी प्रशिक्षक रामचन्दनले यस क्षेत्रका महिला खेलाडीमा खेलप्रति आत्मविश्वास रहेको र प्रतियोगिताले उनीहरूको कौशलतामा वृद्धि गर्न सहयोग पुग्ने बताइन् ।
बाउन्ड्रीका स्वयंसेवक प्रशिक्षक वेलायती नागरिक काउपेड्रीले महिला खेलाडीमा क्रिकेटप्रति उत्सुकता रहेको पाएको जानकारी बताए ।
अर्का स्वयंसेवक प्रशिक्षक एच लाम्वले महिलाहरूलाई घरपरिवारबाट खेल्न लगाइने बन्देज हटाउन चेतना वृद्धिको आवश्यकता रहेको उल्लेख गरे ।
