विराटनगर । मच्छिन्द्र फुटबल क्लबले लगातार दोस्रोपटक केपी ओली कप राष्ट्रिय फुटबल प्रतियोगिताको उपाधि जितेको छ ।
शनिबार दशरथ रंगशालामा भएको फाइनल खेलमा मच्छिन्द्रले न्युरोड टिम (एनआरटी) लाई टाइब्रेकरमा ५-४ गोलले हराउँदै उपाधि जितेको हो ।
उपाधि रक्षा गर्न मच्छिन्द्रका लागि टाइब्रेकरमा सनिश श्रेष्ठ, दिवाकर चौधरी, स्टेफन बिनोङ, क्रिस्टोफर चिजोबा र देवेन्द्र तामाङले गोल गरे ।
एनआरटीका लागि सरोज तामाङ, संजीव विष्ट, अभिषेक लिम्बू र मोहित गुरुङले गोल गरे ।
उपाधिसँगै मच्छिन्द्रले ११ लाख रुपैयाँ पुरस्कार पाएको छ । उपविजेतामा सीमित बनेको एनआरटीले पाँच लाख रुपैयाँ परस्कार पाएको छ ।
विजेतालाई नेकपा एमालेका अध्यक्ष केपी शर्मा ओली लगायतले पुरस्कार प्रदान गरे ।
राष्ट्रिय युवा संघ नेपालको आयोजनामा फागुन ११ गतेबाट सुरु भएको प्रतियोगितामा ‘ए’ डिभिजन लिग खेल्ने सात र भारतका दुई फुटबल टिमको सहभागिता थियो ।
चर्च ब्वाइज युनाइटेड, त्रिभुवन आर्मी क्लब, थ्री स्टार, जावलाखेल युथ क्लब, नेपाल पुलिस, मछिन्द्र फुटबल क्लब र एनआरटी, भारतका दिल्ली एफसी र मानेभञ्ज्याङ एफसी तथा आयोजकको केपी ओली एफसीले भाग लिएका थिए ।
