विराटनगर । नेपाली महिला राष्ट्रिय फुटबल टोलीकी स्ट्राइकर सावित्रा भण्डारी‘साम्बा’ नयाँ रेकर्ड बनाएकी छन् ।
मंगलबार राति सम्पन्न सेमिफाइनलमा खेलमा एक गोल गरेकी साम्बा दक्षिण एसियामा महिलातर्फ सर्वाधिक गोल गर्ने खेलाडी बनेकी हुन् ।
नेपालले सेमिफाइनलमा लेबनानलाई २-१ गोलले हराउँदै फाइनलमा स्थान पक्का गरेको थियो, जसमा साम्बा र प्रीति राईले एक-एक गोल गरेका थिए ।
यससँगै साम्बाले वाफ महिला च्यायम्पियनसिपअन्तर्गत ९ गोल गरिन् ।
उनले भारतीय बालादेवीको नाममा रहेको ५२ गोलको रेकर्ड तोडेकी हुन् ।
सावित्रीले ४६ खेलबाट ५३ गोल गर्दै बालादेवीको रेकर्ड तोडेको हुन् । भारतीय बाला देवीले ६४ खेलमा ५२ गोल गरेकी थिइन् ।
नेपाली महिला फुटबलतर्फ अन्तर्राष्ट्रिय जगतमा परिचय बनाउन सफल साम्बा युरोपेली लिगमा माथिल्लो स्तरको क्लबबाट खेल्ने एकमात्र खेलाडी हुन् ।
उनले फ्रेन्च क्लब अन आभान्ट ग्वेंगाम्पसँग डेढ वर्षको सम्झौता गरेर खेलिरहेकी छन् ।
केही समयअघि उनी इजरायली क्लब हापोएल रानानाबाट ब्यबसायिक फुटबल खेलेकी थिइन् । तर युद्धका कारण उनी इजरायलबाट फर्किएकी थिइन् । उनले छोटो समयमा नै इजरायली क्लबमा आफ्नो उत्कृष्ट प्रदर्शन गर्दा उनी फ्रेन्च क्लबको नजरमा परेकी थिइन् ।
हाल साउदी अरबमा जारी वाफ महिला च्याम्पियनसिपमा ९ गोल सहित गोल्डेन बुटको दावेदार रहेकी साम्बाले सिरिया विरुद्ध १ गोल, इराकविरुद्ध ५ गोल, प्यालेस्टाइनविरुद्ध २ गोल र सेमिफाइनलमा लेबनानविरुद्ध १ गोल गरिसकेकी छन् ।
इराक विरुद्ध ५ गोल गर्दै उनले नेपालको तर्फबाट ५० अन्तरास्ट्रिय गोलको कोषेढुंग आपार गरेकी थिइन् । अन्तरास्ट्रिय खेल मिडियाले नेपाली स्टार साम्बालाई गोल मेसिनको उपमा दिने गरेका छन् ।
