विराटनगर । दोस्रो संस्करणको विराटनगर हब अन्तर विद्यालय महिला क्रिकेट प्रतियोगिता विराटनगरमा हुने भएको छ ।
मंगलबार विराटनगरमा पत्रकार सम्मेलनको आयोजना गरी आयोजकले यसै फागुन १७ गतेदेखि २० गतेसम्म सो प्रतियोगिता हुने जनाएको हो ।
नेपाल क्रिकेट फाउन्डसन र क्रिकेट विथआउट बाउन्ड्रीको सहयोगमा हुने सो प्रतियोगिता विराटनगर महानगरपालिका-६ स्थित ज्वाला क्रिकेट मैदानमा हुने छ ।
१६ ओभरको हुने उक्त प्रतियोगितामा विराटनगरका ६ वटा सामुदायिक विद्यालयहरूको सहभागिता रहने नेपाल क्रिकेट फाउन्डेससनका अध्यक्ष अभिषेक श्रेष्ठले जानकारी दिए ।
प्रतियोगितामा विराटनगरको आर्दश, बालिका, महेन्द्र, सरस्वती, सत्यानारयण र मिल्स स्कुलका महिला खेलाडीहरूले भाग लिने उनले बताए ।
प्रतियोगितामा दैनिक ६ वटा खेलहरू हुने छन् । लिगको आधारमा प्रतियोगिता हुने छ । उनले लिग चरणमा प्रतियोगिता हुने र अंकको आधारमा शीर्ष दुईवटा टोलीले फाइनल खेल्ने छन् ।
प्रतियोगितामा उत्कृष्ट हुने खेलाडीहरूलाई छात्रवृत्ति प्रदान गरिने छ ।
प्रतियोगितामा उत्कृष्ट बलर, प्लेयर अफ द सिरिज, उत्कृष्ट विकेट किपर, उदयमान खेलाडी र उत्कृष्ट ब्याटरलाई छात्रवृत्ति प्राप्त गर्ने भएका छन् ।
यो प्रतियोगिताबाट १४ जना खेलाडीहरू छनोट गरेर राजविराजमा चैतमा हुने टि–२० क्रिकेट प्रतियोगितामा खेखाइने बताइएको छ ।
