विराटनगर । वाफ वुमन्स च्याम्पियनसिपमा नेपालको राष्ट्रिय महिला फुटबल टिमले सिरियामाथि सहज जित निकालेको छ ।
मंगलबार साउदी अरबको किङ अब्दुल्लाह स्पोर्ट्स सिटी स्टेडियममा भएको खेलमा नेपालले सिरियाविरुद्ध ४-१ गोलान्तरको जित निकालेको हो ।
वेस्ट एसियन फुटबल फेडेरेसनले आयोजना गरेको प्रतियोगितामा नेपालले पहिलो पटक सहभागिता जनाएको हो ।
नेपालले लामो समयपछि अन्तर्राष्ट्रिय फुटबल प्रतियोगिता खेल्ने अवसर पाएको हो । घरेलु महिला फुटबल ठप्प जस्तै हुदाँ खेलाडीले मैदान उत्रने अवसर पाएका थिएनन् ।
प्रतियोगितामा नेपाल सहित ग्वाम र साउदी अरेबियाले पहिलो पटक सहभागीता जनाएका हुन् । प्रतियोगिताको यो आठौं संस्करणको हो ।
प्रतियोगितामा नेपाल समूह बीमा रहेको छ । नेपाल रहेको समूहमा सिरिया सहित प्यालेस्टाइन र इराक छन् । नेपालले समूह चरणको खेलमा बिहीबार इराक र शनिबार प्यालेस्टाइनसँग खेल्नेछ ।
उद्घाटन खेलमा समूह एमा जोर्डन र लेवनानले विजयी सुरुवात गरेका छन् । जोर्डन प्रतियोगिताको सर्वाधिक सफल टिम हो । उसले तीन पटक प्रतियोगिताको उपाधि जितेको छ ।
