विराटनगर । भारतको रणजी ट्रफी खेल्ने टिमसँग नेपालले त्रिकोणात्मक टी-२० सिरिज खेल्ने भएको छ ।
सोमबार नेपाल क्रिकेट संघ (क्यान) ले चैत १८ गतेदेखि हुने प्रतियोगिताको तालिका सार्वजनिक गरेको छ, जसमा भारतको क्षेत्रीय टिम गुजरात र बरोडा रहेका छन् ।
सिरिजका सबै खेल गुजरातमा हुनेछन् ।
मार्च २१ मा गुजरातविरुद्ध खेल्दै नेपालले टी-२० सिरिजको सुरुवात गर्ने छ । डबल राउन्ड रोबिनका आधारमा शीर्ष दुई टिमले अप्रिल ७ मा फाइनल खेल्नेछन् ।
भारतीय विदेशमन्त्री एस जयशंकर नेपाल भ्रमणमा आएका बेला क्यानले भारतीय टोलीसँग मैत्रीपूर्ण खेलका लागि प्रस्ताव गरेको थियो ।
सोही प्रस्तावअनुसार भारतीय क्रिकेट बोर्ड (बीसीसीआई) ले क्षेत्रीय टोलीसँग नेपालको प्रतिस्पर्धाका लागि राजी भएको बताइएको छ ।
क्यान म्यानेजर विनोद दासका अनुसार भारतको रणजी ट्रफी खेल्ने टिमसँग नेपालको राष्ट्रिय टिमले सिरिज खेल्न आँटेको हो ।
नेपालले खेल्न लागेका गुजरात र बरोडा दुवैले भारतमा रणजी ट्रफी खेल्दै आएका छन् ।
रणजी ट्रफी भारतको प्रिमियर घरेलु पहिलो क्लासको क्रिकेट प्रतियोगिता हो, जुन प्रतियोगिता भारतीय क्रिकेट बोर्डले हरेक वर्ष आयोजना गर्ने गर्छ । जसमा क्षेत्रीय र राज्य स्तरका क्रिकेट टिम सहभागी हुने गर्छन् ।
भारत विश्व क्रिकेटको शक्तिशाली राष्ट्र हो । भारतीय टिमसँग खेलिने सिरिजले नेपाली क्रिकेटको विकास र खेलाडीको एक्सपोजरमा महत्वपुर्ण योगदान पुग्ने विश्वास क्यानको छ ।
